Detaje të reja bëhen me dije lidhur me plagosjen e trefishtë të ndodhur rreth mesnatës në rrugën “Aleksandër Moisiu” në Tiranë. Dyshohet se pjesëtarë të një grupi rival iu afruan personave që mbetën të plagosur dhe hapën zjarr ndaj tyre, ndërsa këta të fundit kundërpërgjigjen po duke qëlluar me armë zjarri.
Në shkallët e jashtme në hyrje të biznesit duken shenjat e gjakut. Përplasja me armë zjarri ka vijuar edhe në rrugë, derisa autorët kanë humbur gjurmët. Banorë të zonës shprehen se kanë dëgjuar rreth 20 të shtëna me armë zjarri. Kushërinjtë Rivelino Mumajesi, 36 vjeç dhe Juxhin Mumajesi 24 vjeç, bashkë me 28-vjeçarin Ibrahim Durollari, mbetën të plagosur.
Rivelino Mumajesi nuk është një emër i panjohur për policinë. Kjo pasi ai në mars të 2017-ës është përfshirë në plagosje me armë zjarri të Eduard Dukës, raporton news24. Mësohet se janë shoqëruar më shumë se 20 vetë në cilësinë e personave që mund të kenë dijeni për ngjarjen. Megjithatë, ende nuk është raportuar për të arrestuar. Gjithashtu, nuk raportohet nga policia për gjetjen e ndonjë arme zjarri. Grupi hetimor që mbërriti në vendngjarje ka sekuestruar gëzhoja. Pas plagosjes, tre personat e lënduar u transportuan në Spitalin e Traumës me makina të rastit. Policia njoftoi zyrtarisht se, dy nga të dëmtuarit ndodhen jashtë rrezikut për jetën, ndërsa një në gjendje më të rëndë shëndetësore.
ma.me
