Komisioni i Politikës së Jashtme zhvilloi të mërkurën një takim me komisionin e Jashtëm, të Mbrojtjes dhe Sigurisë në Senatin e Republikës Çeke.
Kryetarja e komisionit, Arta Dade vlerësoi mbështetjen që Çekia i ka dhënë Shqipërisë në vitet e tranzicionit dhe axhendën e integrimit, ndërsa veçoi votën ‘pro’ që ky vend ka dhënë për anëtarësimin e Kosovës në UNESCO.
Lidhur me reformën në drejtësi, kryetarja e komisionit, theksoi rëndësinë e saj në luftën kundër korrupsionit, krimit të organizuar.
“Kjo reformë pritet të votohet me konsensus nga parlamenti në muajin korrik”, tha ajo.
Në këtë drejtim, kryetari i komisionit parlamentar, çek Frantisek Bublan vlerësoi progresin e bërë nga Shqipëria për reformat e ndërmarra deri më tani, veçanërisht për reformën në drejtësi. Ai vlerësoi nivelin e marrëdhënieve mes parlamenteve të të dy vendeve, ndërsa shprehu besim për intensifikimin e tyre në fushën ekonomike, arsimit etj.
Pas takimit, në deklaratë e përbashkët për shtyp, znj. Dade shprehu besim se Çekia do të vazhdojë të mbështesë Shqipërinë, ndërsa u ndal tek bashkëpunimi në fushën e energjisë, transportit hekurudhor, arsimit, kulturës, etj.
Kryetari i komisionit çek, Bublan mes të tjerash përsëriti ftesën e Ministrit të Jashtëm të Çekisë, Zaoralek, i cili propozon që në shtator të këtij viti të mbahet një konferencë ku do të ftohen të gjitha vendet e Komunitetit Evropian në Çeki, të cilët të njihen me progresin e reformave të Shqipërisë.
Bublan theksoi gjithashtu nevojën e miratimit me konsensus të reformës drejtësi, si reforma kyçe, por dhe të reformave të tjera. “Unë jam i bindur që kjo reformë kyçe do të kalojë dhe rruga e Shqipërisë për hapjen e negociatave është e hapur”, u shpreh zyrtari çek. (javanews.al / a.r)
