Klevis Balliu rikthehet në parlament si deputet i Partisë Demokratike. Rikthimin në aulën e këtij institucioni e vlerëson përgjegjësi në shërbim të interesit publik.
“Shkoj besimplotë se do të jetë një opozitë ballore, frontale, transparente, e cila do të jetë në ndihmë të qytetareve’, thekson Balliu.
Demokratët pritet të marrin vendim në lidhje me aksionin e tyre politik për legjislaturën e re parlamentare, që nis në muajin shtator. Në intervistën për RTSH-në, Balliu thotë se opozita është e hapur për të gjitha format e reagimit për zgjedhjet e manipuluara, pa përjashtuar as idenë e ngujimit apo të grevës së urisë.
“Vendimet do të merren në forumet e Partisë Demokratike nga ku nuk përjashtohet asgjë. Nëse kjo formë reagimi është e nevojshme, ta provojmë. I vetmi institucion legjitim, sot në Shqipëri, është opozita dhe si i tillë, përgjegjësia sikundër misioni i saj është shume herë më i madh“, shprehet deputeti i zgjedhur demokrat.
Në betejën jetike për vendin, siç e cilëson atë për zgjedhje të lira, Partia Demokratike thotë deputeti i zgjedhur Klevis Balliu, ashtu siç pritej, nuk pati në krah as sistemin e drejtësisë. Opozita denoncoi bandat që ishin në qendrat e votimit, të cilat nuk u panë nga SPAK thekson Balliu.
“Siç ishte rasti i Xhabaftëve në Vorë, i Troplinëve në Durrës, i Suel Çelës në Elbasan. Pyetja ngrihet: Po këta superprokurorët që do të bënin namin në zgjedhje, përse nuk i gjetën dot këto prova?! Nuk i gjejnë sepse nuk duan t’i gjejnë”, thekson Balliu.
Klevis Balliu thekson se zgjidhje është largimi i Kryeministrit Edi Rama, i cili nuk lejon garën e barabartë të palëve në zgjedhje. Partia Demokratike ka kërkuar mbajtjen e zgjedhjeve të reja me garant qeverinë teknike.
