Kryebashkiaku i Fushë-Arrëzit, Hilë Curri dhe kryebashkiaku i Memaliajt Albert Male janë mes protestuesve para parlamentit që kundërshtojnë hartën e re të reformës territoriale. Në një deklaratë për mediat Hilë Curri tha se nga 15 bashkitë që do të shkrihen, preken 300 mijë protestues. Sipas tij kjo reformë nuk ka lidhje me hartën e ekspertëve të BE.
“Një nga ato 15 kryetarët që preket nga reforma klienteliste, reforma që është bërë bnënë tavolinat e deputetëve të grupit që ka bërë hartën territoriale, e cila s’ka lidhje me hartën e ekspertëve të BE. Jam bashkë me kolegët e mi të Memaliajt dhe jemi në emër të 15 kryetarëve dhe 300 mijë banorëve që preken nga ajo reformë. Si shpëtoi Konispoli, Delvina? Kjo është një reformë që Arbjan Maznikun do ta ndjekë historia! Çuni më i keq që ka njohur Tirana, do të marrë në qafë 300 mijë shqiptarë. Harta nuk i përshtatet komunitetit europian, nuk i afron shërbimet, shkatërron bashkitë që kanë histori, identitet, krahinë. Këta s’kanë shanse të na ndalojnë në rrugën e drejtë e të shenjtë që kemi. Jemi këtu derisa ata të parlamentit të mos votojnë. Ne do të rezistojmë!”, tha Curri.
Edhe kryebashkiaku i Memaliajt bëri thirrje që të mos kalohet për votim reforma territoriale, pasi sjell vetëm shpopullim.
“Kjo reformë nxit vetëm shpopullim në të gjitha këto qytete që shkrihen bashkitë. Ju bëj thirrje të gjithë deputetëve që të mos e votojnë këtë reformë shpopulluese, e cila është në kundërshtim me kushtetutën e BE. Nuk sjell asnjë zhvillim veçse shpopullim. Vetëm harta e propozuar nga PD ripopullon gjithë Shqipërinë. Ju bëj thirrje të mos e votojnë këtë reformë”.
