Edhe pse nisi si një diskutim i thjeshtë mes deputetëve të Komisionit të Jashtëm për nje marrëveshje mes qeverisë e SHBA-ve ne luften kunder trafikut te droges, debati shpejt shpërtheu me akuza të rënda, kryesisht drejtuar ish-qeverisë Berisha.
Ka qenë Kryetarja e komisionit Arta Dade e cila hodhi hodhi akuza të drejtpërdrejta ndaj ish-kryeministrit Sali Berisha duke e cilësuar kriminel.
“Berisha ka furnizuar me naftë makinerinë e Millosheviçit”, – tha Dade, ndërsa i vijoi akuzat e saj edhe për raste të tjera që sipas saj e përfshijnë ish-kreun e qeverisë së djathtë edhe në masakrën e Srebrenicës.
“Ministrat e PD-së kanë çuar fishekë në Ruanda. Berisha ka çuar edhe fishekë në Srebrenisë, atje ku është bërë masakra”, -tha Dade.
“Shpërthimi” i Dades u nxit nga akuzat që deputeti demokrat Aldo Bumçi ngriti pothuajse gjatë gjithë mbledhjes, për kandidatët e mazhorancës për kryebashkiak në zgjedhjet e 21 qershorit, që sipas Bumçit janë të inkriminuar.
“Ne si Parti Demokratike mbështesim policinë, por dyshojmë se nuk ka vullnet politik, sepse ju mbroni njerëz kriminelë. Çfarë mesazhi i jepni policisë. Sa jemi të besueshem ne kur ambasadori i SHBA tha të mos kandidojmë njerëz të inkriminuar”, tha Bumçi.
