Presidenti i Sirisë, Ahmed al-Sharaa, ka rrëfyer një bisedë të pazakontë me presidentin amerikan Donald Trump, gjatë një aktiviteti të Këshillit Atlantik në Nju Jork, në kuadër të Asamblesë së Përgjithshme të Kombeve të Bashkuara.
Al-Sharaa tha se gjatë një takimi në Shtëpinë e Bardhë, Trump i kishte thënë se Lartësitë e Golanit i përkasin Izraelit. Presidenti sirian tregoi se i ishte përgjigjur me një batutë, duke e pyetur pse Shtetet e Bashkuara nuk ia jepnin Izraelit New Jersey-n.
Duke shpjeguar krahasimin, al-Sharaa theksoi se Trump nuk ka të drejtë të vendosë për sovranitetin mbi Golanin. “Trumpi nuk zotëron Lartësitë e Golanit”, tha ai, duke përsëritur qëndrimin e Damaskut se territori është pjesë e shtetit të Sirisë.
“Pallati presidencial është bombarduar dy herë. Edhe aeroportet tona janë goditur. A do t’u sjellë kjo siguri qytetarëve izraelitë?”, deklaroi al-Sharaa.
Sipas tij, Siria ka zgjedhur rrugën e dialogut dhe gjatë vitit të fundit ka zhvilluar negociata të drejtpërdrejta me Izraelin. Al-Sharaa pretendoi se palët kishin avancuar deri në rreth 90 për qind të një marrëveshjeje për një kornizë sigurie, përpara se negociatat të ndërpriteshin dhe të shfaqeshin kërkesa të reja.
Ai tha se Damasku mbetet i gatshëm të rikthehet në tryezën e bisedimeve, por kërkoi që fillimisht Izraeli të tërhiqet nga territoret në jug të Sirisë. Vetëm pas kësaj, sipas tij, duhet të diskutohen marrëveshjet e sigurisë.
Al-Sharaa përsëriti në fund qëndrimin e Sirisë se Lartësitë e Golanit janë territor sirian dhe se statusi i tyre territorial nuk është një çështje që Damasku e konsideron të negociueshme.
