Dy persona janë arrestuar në Tiranë dhe Krujë, pasi u kapën duke poseduar armë dhe sende të tjera të kundërligjshme. Policia njofton se gjatë dy operacioneve të zhvilluara brenda 24 orëve janë sekuestruar 3 armë, 17 kapsolla elektrike, municion luftarak, një shënjestër optike, 2 mjete prerëse dhe një peshore elektronike.
Operacionet janë finalizuar nga strukturat e Drejtorisë Vendore të Policisë Tiranë, në kuadër të shtimit të vigjilencës dhe intensifikimit të punës operative për parandalimin e ngjarjeve kriminale që mund të kryhen nga persona që posedojnë armë në mënyrë të paligjshme.
Në kuadër të operacionit të koduar “Qëllimi”, Forca e Posaçme “Shqiponja”, në bashkëpunim me shërbimet e Komisariatit të Policisë Nr. 4, arrestoi shtetasin A. Z., 36 vjeç, me precedent penal.
Gjatë kontrollit në banesën e tij, sipas Policisë, u gjetën dhe u sekuestruan 2 armë zjarri, një pistoletë dhe një armë automatike, së bashku me municion luftarak, një shënjestër optike, 2 mjete prerëse dhe një peshore elektronike.
Ndërkohë, në kuadër të operacionit “Kontrolli”, shërbimet e Komisariatit të Policisë Krujë arrestuan shtetasin F. L., 28 vjeç.
Në banesën e tij, në fshatin Brret, policia thotë se u gjetën një armë gjahu, 84 fishekë dhe 17 kapsolla elektrike, të cilat dyshohet se posedoheshin pa leje.
Sipas Policisë së Tiranës, vijojnë hetimet për të zbardhur dhe dokumentuar përfshirjen e dy personave të arrestuar në veprimtari të tjera kriminale.
