Përfaqësuesi Special Presidencial i Shteteve të Bashkuara të Amerikës, Richard Grenell, ka reaguar pas qëndrimit të djeshëm të kreut të opozitës, Kadri Veseli, pasi ky i fundit ka thënë se Albin Kurti nuk duhet të ngutet për ta hequr taksën ndaj Serbisë.
Grenell në një reagim në llogarinë e tij zyrtare në twitter i është drejtuar Kadri Veselit duke i thënë se Shtetet e Bashkuara të Amerikës janë duke kërkuar heqjen e taksës dhe se Albin Kurti ka të drejtë kur thotë se do ta heqë atë.
“Kadri, Shtetet e Bashkuara të Amerikës po i kërkojnë Kosovës që ta heqin taksën 100 %. Po e dëmton Kosovën dhe po pengon bizneset të krijojnë vende të reja të punës. Albini ka të drejtë këtu”, ka shkruar Grenell.
Ndërsa Veseli në postimin e tij, kishte shkruar se Kosova i është mirënjohëse presidentit amerikan, Donald Trump, për vëmendjen dhe kujdesin e vazhdueshëm që ai tregon ndaj Kosovës.
“Ne e dimë që jemi në rrugën e duhur në çdo proces kur kemi mbështetjen e SHBA-ve. Shumë faleminderit ambasadorit Rrichard Grenell dhe këshilltarit të sigurisë Robert O’Brien për rolin vendimtar”, kishte shkruar Veseli.
Gjithsesi, reagimi i Grenell vjen pas një deklarate të bërë të enjten nga Kadri Veseli, lidhur me taksën ndaj produkteve serbe.
Kryetari i PDK-së, Kadri Veseli, ka reaguar ashpër ndaj paralajmërimeve të kryeministrit Albin Kurti se do ta heqë së shpejti tarifën ndaj mallrave serbe, duke e zëvendësuar me reciprocitet.
“Shpreh shqetësimin për ngutin e tepruar të kryeministrit të ri për të përmbushur kërkesat e Serbisë dhe për të rehatuar Listën Serbe, e cila u largua nga qeveria e kaluar për shkak të taksës. Një qeveri ka rënë si pasojë e taksës, gjë që ka dobësuar për një kohë Kosovën”, ka shkruar Veseli në faqen e tij në Facebook.
Grenell heqjen e taksës e ka kërkuar edhe gjatë vizitës së tij të fundit në Prishtinë, ndëkrohë kishte thënë se është i përkushtuar për një rinisje të negociatave Kosovë-Serbi, përmes bashkëpunimit ekonomik.
Heqjen e taksës e kërkon edhe Gjermania e kancelares gjermane, Angela Merkel. Sipas tyre është një hap shumë i rëndësishëm për rinisjen e dialogut.
g.kosovari
