Kimberly Guilfoyle, ambasadorja e Shteteve të Bashkuara në Greqi dhe ish-e fejuara e Donald Trump Jr., është në qendër të një polemike pas publikimit të një raportimi të Uall Street Journal, sipas të cilit ajo i kërkoi një financuesi të lëvizjes MAGA, Eric Deters, 100 mijë dollarë për të shlyer një detyrim në kartën e saj të kreditit American Express.
Sipas gazetës amerikane, Guilfoyle kërkoi që paratë të transferoheshin pa lënë gjurmë, në një periudhë kur ajo po përgatitej për konfirmimin e saj si ambasadore në Senatin amerikan.
Ngjarja daton në korrik të vitit 2025, kur Guilfoyle po kalonte procesin e konfirmimit për postin diplomatik në Greqi. Sipas mesazheve të siguruara nga Uall Street Journal, të shkëmbyera përmes aplikacionit të komunikimit Signal, ajo iu drejtua urgjentisht Detersit për ndihmë financiare. Në një prej mesazheve, ajo i shkruante: “Zemër, të lutem, kam nevojë që ta bësh këtë për mua sot”.
Sipas raportimit, shuma prej 100 mijë dollarësh do të përdorej për të mbuluar një detyrim në kartën e kreditit. Kërkesa për të mos lënë gjurmë të transaksionit ka tërhequr vëmendjen, veçanërisht për shkak të pozicionit të Guilfoyle në rrethin politik të presidentit Donald Trump dhe rolit që ajo po merrte në diplomacinë amerikane.
Megjithatë, kërkesa nuk u realizua. Eric Deters, sipërmarrës dhe ish-kandidat për Kongresin në shtetin e Kentakit, refuzoi t’i jepte shumën e kërkuar. Avokati i Guilfoyle argumentoi se paratë i takonin asaj si pagesë për pjesëmarrjen në aktivitete patriotike, ndërsa Deters e kundërshtoi këtë version.
Deters nuk ishte një person i panjohur për ambasadoren. Sipas raportimit, ai i kishte paguar Guilfoyles rreth 300 mijë dollarë ndër vite për pjesëmarrjen e saj në Kentucky Freedom Fest, një aktivitet që organizohet në Kentaki. Marrëdhënia mes tyre, megjithatë, duket se përfshinte edhe pritshmëri të tjera politike dhe personale.
Sipas gazetës, Deters shpresonte të përdorte lidhjet e Guilfoyle me administratën Trump për të ndihmuar në zgjidhjen e disa problemeve të tij me autoritetet tatimore dhe Departamentin e Drejtësisë. Ai gjithashtu kishte premtuar një shpërblim prej një milion dollarësh nëse ajo do ta ndihmonte të siguronte një intervistë me komentatorin Tucker Carlson. Sipas raportimit, këto përpjekje nuk dhanë rezultat dhe as kërkesa për 100 mijë dollarë nuk u përmbush.
Guilfoyle është një figurë e njohur në politikën amerikane, jo vetëm për lidhjet e saj me familjen Trump, por edhe për karrierën në drejtësi dhe televizion. Ajo ka punuar si prokurore në Kaliforni, përpara se të bëhej komentatore ligjore dhe të bashkohej me rrjetin Fox në vitin 2006. Më vonë u bë një nga zërat e njohur të lëvizjes MAGA dhe mori pjesë në aktivitete e konventa të mbështetësve të Trump.
Jeta e saj personale është ndërthurur vazhdimisht me politikën. Guilfoyle ishte e martuar me Gavin Neusom, guvernatorin demokrat të Kalifornisë, përpara se të lidhej me Donald Trump Jr. Çifti u fejua në vitin 2022, por marrëdhënia përfundoi pasi Trump Jr. u shfaq publikisht me Bettina Anderson në vitin 2024. Më pas, Donald Trump emëroi Guilfoyle në postin e ambasadores amerikane në Greqi.
Pas humbjes së Trump në zgjedhjet presidenciale të vitit 2020, Guilfoyle u përpoq të ndërtonte edhe aktivitete të veta tregtare, duke promovuar produkte për flokët, vodka, shampanjë dhe shërbime konsulence. Sipas raportimit, këto iniciativa kishin shkaktuar pakënaqësi në disa qarqe të kampit Trump, pasi ajo po përqendrohej edhe në mbledhjen e fondeve për projektet e veta.
Polemika rreth ambasadores nuk kufizohet vetëm te kërkesa për para. Javën e kaluar, demokratët në komisionet e politikës së jashtme të Dhomës së Përfaqësuesve dhe Senatit i kërkuan Departamentit të Shtetit të shqyrtonte sjelljen e saj, duke iu referuar edhe një raportimi të mëparshëm të Uall Street Journal mbi promovimin e një kompanie greke. Sipas artikullit, një lobist i lidhur me kompaninë udhëtonte me të gjatë vizitave në rajonin e Ballkanit.
Nga ana tjetër, sekretari amerikan i Shtetit, Marco Rubio, e ka vlerësuar publikisht Guilfoylen gjatë vizitës së tij në Athinë, duke e cilësuar një ambasadore të fortë. Deri më tani, pretendimet e raportuara për kërkesën financiare dhe çështjet e tjera të ngritura ndaj saj mbeten pjesë e një debati publik, ndërsa palët kanë dhënë versione të ndryshme për natyrën e marrëdhënies financiare mes saj dhe Detersit.
Rasti rikthen në vëmendje marrëdhëniet mes financuesve politikë, interesave private dhe zyrtarëve të emëruar në poste të rëndësishme publike në Shtetet e Bashkuara. Ai vjen gjithashtu në një kohë kur disa persona të afërt me Trump janë përballur me pyetje mbi aktivitetet e tyre private dhe lidhjet me qeveri apo subjekte të huaja. Për Guilfoyle, polemika mund të shtojë presionin politik mbi një mandat diplomatik që tashmë është vënë nën vëzhgim për shkak të raportimeve mbi aktivitetet e saj dhe lidhjet me interesa tregtare.
