Çudia shqiptare: Gruas i japin ilaçe për prostatën
Hetimet për skandalin e barnave nxjerrin në dritë të tjera abuzime me rimbursimet. Prokuroria ka përfunduar verifikimin për 4 farmaci fiktive që i kishin shkaktuar buxhetit të shtetit një dëm prej gjysmë milion eurosh. Në fazë verifikimi janë edhe 28 farmaci të tjera, ku parashikohet se dëmi mund të jetë shumë herë më i lartë. Por, gjatë verifikimeve të këtyre farmacive, që në rastin konkret nuk janë fiktive si të parat, prokuroria ka gjetur një mori shkeljesh në recetat që kanë depozituar në Fondin e Kujdesit Shëndetësor në Tiranë. Shumë prej recetave janë fiktive, ndërsa të tjera janë me probleme.
Madje, gjatë verifikimeve, rezultoi se një doktor në Tiranë kishte firmosur një recetë për një grua, së cilës i kërkonte që të merrte disa ilaçe prostate.
Njësia Task-Forcë e Prokurorisë së Tiranës thotë se hetimet për këtë skandal janë shtrirë edhe ndaj 28 farmacive të tjera, që përfituan nga rimbursimet me anën e falsifikimeve. Hetimet ngjasojnë me skemën e mashtrimit me TVSH-në, ndërsa akuza thotë se do të kryhen një mori verifikimesh në QKR apo në QKL. Prokuroria sqaron se skema e falsifikimit mund të jetë bërë me ndihmën e Drejtorisë Rajonale të Fondit të Tiranës. Akuza ka dyshime se të paktën 28 farmaci, me kontratë nga sigurimet shëndetësore, të cilat kanë përfituar rimbursimin e barnave, janë në proces verifikimi.
Prokuroria po bashkëpunon me antikorrupsionin në qeveri apo me Fondin e Kujdesit Shëndetësor në Tiranë, ndërsa konstatoi farmacitë në fjalë. Tashmë kanë filluar veprimet krahasuese apo edhe dëshmitë, ku mjekët që kanë emrin në receta po merren në pyetje. Nëse rezultojnë se nuk kanë firmosur, atëherë farmacitë apo zyrtarët që lëshuan rimbursimet do të ndiqen penalisht, siç edhe ndodhi për disa persona pak muaj më parë. Megjithatë, rastet e çuditshme të dhënies së recetave, apo të marrjes së rimbursimeve nga farmacitë, nuk kanë munguar.
“Hetimet e tanishme janë në fazën e verifikimit të çdo recete që ka shkuar në Fondin e Kujdesit Shëndetësor nga 28 farmacitë. Një nga këto receta ka rezultuar me probleme. Receta kishte emrin e mjekut, personin që përfitonte apo edhe barnën përkatëse. Ilaçi ishte për prostatën, ndërsa çudia qëndronte te përfituesi, që në këtë rast, ishte një grua”, – pohojnë burimet nga prokuroria. Sipas saj, hetimet për këtë rast do të verifikohen më tej, ku do të verifikohet nëse është e saktë apo e falsifikuar, ku fillimisht do të merret informacion për emrin e mjekut, gruan që e ka përfituar apo edhe administratorin e farmacisë që e ka dorëzuar në Fondin e Kujdesit Shëndetësor.
Megjithatë, burimet nga akuza pohojnë se janë mijëra receta që janë sekuestruar dhe ato do të verifikohen, për të nxjerrë dëmin që i është shkaktuar shtetit apo edhe përgjegjësit, duke mos përjashtuar as zyrtarë të tjerë të Kujdesit Shëndetësor. Gazeta Shqip
