Patriotët janë ndër sistemet kundërajrore më të testuara në betejë në botë.
Në duart e Ukrainës, ato mund të ofrojnë zgjidhje kundër avionëve dhe raketave ruse. Por gjëja kryesore mungon: raketat që sistemi përdor për të rrëzuar kërcënimet.
CNN ishte media e parë që fitoi akses në një sistem raketash Patriot në tokën ukrainase dhe raporton atë që pranon pala ukrainase, qoftë hapur ose tërthorazi: vendi pothuajse i ka shteruar raketat e përdorura nga sistemi.
16 lëshuesit e sistemit që CNN pa tregojnë shenja përdorimi të rregullt, por, sipas operatorëve të tij, kanë kaluar rreth 1.5 muaj që kur u qëllua për herë të fundit. Në një rast tjetër, sistemi është përdorur për herë të fundit 2.5 muaj më parë.
“Të thyen zemrën vërtet kur ke pajisjet, por nuk je në gjendje të kapësh asnjë raketë”, tha një nga operatorët e Patriot, duke shtuar se “raketa balistike fluturojnë mbi kokën tënde dhe nuk mund të bësh asgjë për këtë, ndërsa civilët janë pas teje”.
Ukraina ngurron të japë detaje rreth numrit të saktë të raketave që i kanë mbetur. Presidenti Volodymyr Zelensky thotë se vendit i duhen 5% të rezervave amerikane për të mbijetuar dimrin, por aktualisht ka vetëm 1% .
Megjithatë, nuk dihet se me sa raketa korrespondon kjo përqindje shumë e ulët. Ndërkohë, nuk është e qartë se sa raketa i kanë premtuar Shtetet e Bashkuara Ukrainës, as madhësia e rezervave amerikane.
Por nuk janë vetëm ukrainasit që kanë mbaruar raketat interceptuese Patriot.
Kriza është globale dhe u shkaktua nga përdorimi masiv i tyre në mars dhe prill në luftën kundër Iranit, shpesh për t’iu kundërvënë sulmeve iraniane me dronë. Domethënë, një raketë që kushton 2-3 milionë dollarë për një dron që kushton disa mijëra dollarë.
Shtetet e pasura të Gjirit mendohet se kanë përdorur qindra raketa . Instituti i Kërkimeve të Politikës së Jashtme vlerëson se forcat e koalicionit përdorën mesatarisht 225 raketa në ditë gjatë katër ditëve të para të luftës me Iranin.
Nga ana tjetër, Lockheed Martin, i cili prodhon raketat, prodhoi 620 raketa në vitin 2025. Vetëm në janar, Pentagoni nënshkroi një marrëveshje shtatëvjeçare me kompaninë që Lockheed Martin të ndërtonte 2,000 raketa në vit deri në vitin 2030.
Ukraina e dinte se konflikti në Lindjen e Mesme do ta ndikonte përfundimisht, por kishte pak që mund të bënte për këtë.
Në një intervistë me CNN, Zelensky trajtoi çështjen komplekse të Ukrainës që të prodhonte raketat e veta Patriot , me lejen e SHBA-së, duke thënë se i kishte ofruar Raytheon dhe Lockheed Martin pronësinë dhe kontrollin e çdo fabrike prodhimi raketash që ata do të lejonin në Ukrainë.
«Do të jetë kompania juaj, me ‘mendjet’ dhe duart tona, me inxhinierët tanë », u kishte thënë ai amerikanëve, por deri më sot kërkesa e Ukrainës mbetet në pritje.
