Gazeta serbe “Blic” vijon të pretendojë për një “marrëveshje” të fshehtë mes Shqipërisë dhe SHBA-së. Në një artikull të botuar sot gazeta shprehet se shumë zyrtarë ndërkombëtarë perëndimorë po refuzojnë të dënojnë në deklaratat e tyre siç e quajnë ata “terrorizmin e shqiptarëve”, dhe në vend të kësaj ata po lëshojnë deklarata përgjithësuese për “grupe kriminale”, dhe “incidente ndëretnike”.
Sipas “Blic”, përfaqësues të BE-së, SHBA-së dhe të NATO-s po mënjanojnë dënimin e akteve “terroriste”, pavarësisht faktit se këto grupe provokuan konfliktin në Maqedoni.
“Blic” shkruan se Perëndimi po sillet si në rastin e Maqedonisë në vitin 2001, kur Maqedonia pothuajse ishte ndarë nga valët e dhunës.
Sipas gazetës serbe, kjo vjen për shkak si pasojë e interesave të ndryshme të vendeve.
Historiani serb, Bojan Dimitrijeviç ka thënë se elita politike shqiptare e ka fuqinë dhe paratë që të influencojë qarqe të caktuara të Perëndimit. Ai poashtu ka thënë se Shqipëria është aleanca më e devotshme ndaj SHBA-së dhe një pjese të Evropës.
