“Me 300 veta luhet loja”. Kështu u shpreh këtë të hënë Drejtori i Përgjithshëm i Arkivave, Ardit Bido, duke komentuar mbi censusin dhe minoritetin grek në Himarë. Ai u shpreh se ata që mendojnë se një fshat i tërë shqiptar i zonës duhet ta harrojnë që të deklarohen si grekë pasi bëhet fjalë për një zonë mjaft patriotike.
“Është 300 veta dhe këtu është gjithë çështja. Ta harrojnë të gjithë që do të deklarohen një fshat ortodoks shqiptar i zonës si grek i tëri, me përjashtim të Mursisë që është një risk sepse prodhohen nga dy individë. Sepse atje është një zonë shumë patriotike.
Atje kërkohen 300 veta. 5.5%. Me 300 veta luhet loja”, tha Bido.
Kujtojmë se me arritjen e 20% një grupimi të caktuar etnik duhet të ketë tabela dygjuhëshe, duhet të ketë gjuhë zyrtare gjuhën e asaj pakice, duhet të ketë ngritjen e flamurit të asaj pakice në institucionet shqiptare dhe duhet të ketë shkolla dygjuhëshe.
“Ky risk nuk bëhet prej njerëzve që ndihen grekë, bëhet prej njerëzve që ndihen shqiptarë, por që shteti grek përmes mekanizmave të presionit, përmes rolit të kishës ortodokse në zonë, përmes rolit të organizatave…”, u shpreh Bido.
I pyetur nëse në këtë çështje ka dorë shteti grek, Bido u përgjigj kështu: Nuk mund të them shteti grek, por strukturat shtetërore greke është shumë e qartë. Nuk mund ta them që është politika apo burokracia greke, e kam tezën time, por nuk mund të flas pa e faktuar shkencërisht, por është shumë e qartë që janë të paktën strukturat shtetërore greke. Pse? Sepse Fredi Beleri në zgjedhjet e fundit ndërhynte për shtetësi. Doli dhe në përgjime që ndërhynte për shtetësi. Ndërhynte për dhënie të shtetësisë greke.
/a.r
