Ish-kryeministri Sali Berisha deklaroi në kuvend se gjatë kohës së qeverisjes së tij u arritën objektiva të rëndësishëm për vendin, falë luftës kundër krimit.
“Ishte lufta pa kompromis ndaj krimit që solli bisedimet për marrëvshjen e stabilizim-asocimit, anëtarësimin në NATO, heqjen e vizave, shpartallimin e 200 bandave kriminale që prisnin koka njerëzish në sheshe qytetesh”, tha Berisha.
Berisha pranoi trafikun e drogës nga Lazarati, i cili u ndërpre pas aksionit të madh policor të vitit të kaluar, por sipas tij kjo nuk do të thotë se Shqipëria nuk është më një vend i trafikimit të drogës. Për Berishën, kapja e shumë trafikantëve të drogës sot ka vetëm një shpjegim shumë të thjeshtë.
“Është e vërtetë që Lazarati prodhonte kanabis, nuk e kam mohuar dhe nuk e mohoj, por sot Shqipëria është e zhytur në drogë si kurrë më parë në historinë e saj. Po kapet më shumë drogë sot, e vërtetë, por është e thjeshtë fare, po kapet se Shqipëria është vërë Kolumbi e kanabisit, po mbillen në zonat e deputetëve. Kapet më shumë se Shqipëria sot mbjell më shumë kanabis e e gjithë Europa e marrë së bashku. Tepelena është bërë kryeqyteti i kanabisit në Europë”.
Ish-kryeministri, duke folur për lidhjet e qeverisë me krimin tha se “Arben Frroku shëtit i lirë. Është e vërtet që ju me gjykatës të Ed Ramës i dhanë pafajësinë, i bëtë vëllanë deputet, ia fshehët kërkesën për ekstradim nga Brukseli. Nuk ia fshehu opozita”.
