Rruga e Kosovës është në Evropë. Është mbajtur takimi i radhës i Forumit të Nivelit të Lartë për koordinimin e donacioneve. Gjatë diskutimeve të zhvilluara në këtë takim, të organizuar nga Ministria e Integrimit Evropian, janë prezantuar të gjeturat kryesore të Raportit të donacioneve për vitin 2014, si dhe prioritet e ardhshme të Qeverisë së Republikës së Kosovës. Ndërsa kryeministri Isa Mustafa tha se Kosova ka bërë progres të jashtëzakonshëm viteve të fundit në çdo sferë të shoqërisë dhe se ky progres, u realizua falë bashkëpunimit dhe ndihmës së vazhdueshme të partnerëve ndërkombëtarë, ministri i Integrimit Evropian, z. Bekim Çollaku, prezantoi Raportin vjetor për koordinimin e donacioneve për vitin 2014.
Ministri Çollaku njoftoi pjesëmarrësit se gjatë vitit 2014, në Kosovë janë alokuar 212.4 milion euro donacione, me fokus në zhvillimin ekonomik dhe sundimin e ligjit. Donatorët më të mëdhenj kanë mbetur të pandryshuar, pra Bashkimi Evropian, Shtetet e Bashkuara të Amerikës. “Donatorët kanë mbështetur sektorët që janë prioritet për Qeverinë e Republikës së Kosovës”, ka thënë ministri Çollaku.
