Pas pezullimit nga puna të prezantuesit të emisionit ‘Match of the Day ’ në BBC, Gary Lineker dhe kaosit që u krijua, rrjeti televiziv BBC u ka kërkuar falje punonjësve.
“Na vjen keq për ndikimin që lajmet në lidhje me Gary Lineker dhe Match Of The Day kanë në të gjithë departamentin. Ne e kuptojmë se sa shqetësuese është kjo për të gjithë stafin e BBC Sport dhe komunitetin tonë të pavarur ”, thuhet në letër.
Shumë gazetarë të gjigandit britanik protestuan ndaj trajtimit që ju bë prezantuesit britanik Gary Lineker. Disa prej tyre dhanë dorëheqjen në shenjë solidariteti me Lineker.
Drejtuesit e televizionit morën masa ndaj ish-futbollistit të Anglisë për shkak të një postimi në rrjtetet sociale në të cilin ai dënonte politikën e propozuar të emigracionit nga qeveria konservatore.
Lineker, një prej futbollistëve më të mëdhenj që kanë luajtur me kombëtaren e Anglisë, e quajti gjuhën me të cilën u prezantua projektligji sipas të cilit do t’u refuzohet azili atyre që hyjnë në vend ilegalisht “jo shumë të ndryshme nga ajo e përdorur në Gjermaninë e viteve 1930”.
Reagimi i tij u kritikua nga politikanët konservatorë në Britaninë e Madhe. Ministrja e Brendshme, Suella Braverman, e cila prezantoi draftin, tha se ishte e zhgënjyer nga fjalët e Lineker.
/a.r
