Kryetari i partisë Demokratike Lulzim Basha ka ripërsëritur kërkesën e opozitës për implementimin e votimit elektronik, si një garanci siç tha ai për zgjedhje të lira e të ndershme. Nga selia blu ku mblodhi koordinatorët e kësaj force, Basha foli në lidhje me përgatitjet për zgjedhjet e Qershorit.
“Spikat propozimi ynë për votimin elektronik, që i jep zgjidhje përfundimtare disa problemeve. Duke votuar me shenjën e gishtit, asnjë shqiptari nuk do t’i mohohet e drejta për të votuar. Mbledhja e kartave nuk do të funksionojë. As mekanizmi i votuesve shëtitës. Askush nuk do të fusë më duart te votat e shqiptarëve. Nuk do ketë mundësi ku ushtritë e kriminelëve të tjetërsojnë votën e shqiptarëve”, tha Basha.
Basha tha më tej se forca që ai drejton do të kryejë një proces Vettingu për kandidatët e saj për deputetë. Ai deklaroi se do të ndiqet një kontroll i imtësishëm sipas praktikave të avancuara.
“Çështje tjetër e rëndësishme është përgatitja për mbledhjen e kandidatëve për deputetë të PD. Propozimi im është për një konsultim të hapur. Lista e kandidatëve të PD që unë do kryesoj, do i nënshtrohet një procesi Vettingu. Kontroll i imtësishëm, sipas praktikave të avancuara amerikane”, tha Basha./a.m.
