Kryetari i Partisë Demokratike ka sulmuar pasditen e së martës Prokurorinë.
Lulzim Basha numëron një sërë akuzash ndërsa shprehet se në Shqipëri ka dy lloje drejtësish.
Reagimi i Bashës vjen pas atij të Petrit Vasilit, që shprehej për padinë ndaj Edi Ramës.
Vasili shkonte më tej, teksa sulmonte edhe Reformën në Drejtësi.
Dhe me të njëjtën gjuhë ka reaguar edhe kreu i PD, që është nën hetim:
“Prokuroria ka refuzuar të hapë hetimet për Edi Ramën, edhe pse ai mashtroi publikisht se kishte bërë ekspertizë private të audiopërgjimit, me qëllim të qartë që të mbronte një kriminel dhe për të ndikuar dhe kërcënuar organet e drejtësisë që të mos hetonin.
Gjithashtu, sot, prokuroria ka refuzuar të marrë nën hetim Ardi Veliun dhe Taulant Ballën.
Po sot, prokuroria ka lëshuar përmes mediave të pushtetit lajmin se Saimir Tahiri e ka të ligjshëm gjithë lluksin në të cilin jeton.
Është e njëjta prokurori që burgosi kuksianët, që burgos përditë njerëzit e thjeshtë për shkeljet më të lehta, që heton gazetarët kritikë dhe kundërshtarët politikë.
Në Shqipëri janë vendosur dy drejtësi: një për Edi Ramën dhe kriminelët dhe një tjetër për popullin. Edi Rama dhe kriminelët janë mbi ligjin, kurse mbi popullin ushtrohet dhunë duke abuzuar ligjin. Kësaj “drejtësie” do ti vijë fundi shumë shpejt!”
/JavaNews/b.d
