Çështja e pajisjes së përgjimeve është kthyer në kryefjalën e aksionit opozitar të kësaj të hëne, teksa veç deputetëve në komisionin e sigurisë, edhe lideri i opozitës Lulzim Basha ka kërkuar që të merren në pyetje Ministri Tahiri, Kreu i Policisë Çako, Kryeprokurori Llalla si dhe kreu i SHISH Visho Ajazi Lika. Kryedemokrati shtoi se që nga dita kur ka dalë në media kjo çështje, Rama ka heshtur, një shenjë që për Bashën është provë se Kryeministri fshihet prapa përgjimeve.
“Vetë Policia e ka pranuar publikisht se posedon një pajisje të tillë ndërsa Rama dhe Tahiri heshtin. Kjo pajisje ka hyrë pa u regjistruar dhe pa lejen e Prokurorisë. Në hierarkinë e skandaleve, ky padyshim zë vendin e parë përgjegjësi shkojnë drejtpërdrejtë tek kryeministri Edi Rama. Prej ditës kur skandali është bërë publik, Rama nuk ka thënë asnjë fjalë të vetme, duke lënë të kuptohet se fshihet prapa këtij krimi.
Transparenca për këtë skandal politik dhe kriminal është një emergjencë imediate ligjore, shoqërore dhe morale. Qytetarët kanë nevojë të mësojnë një orë e më parë të vërtetën. Ne kemi kërkuar një dëgjesë urgjente nesër paradite në komisionin e sigurisë, Ministrin, Kreun e Policsë, kreun e SHISH dhe kryeprokurorin.
Ai (Rama) duhet të mbajë dhe do të mbajë përgjegjësi për përgjimin mafioz të Presidentit, opozitës, të ambasadorëve dhe gazetarëve të vendit.”- tha Basha.
Por në të njëjtin interval kohor, në një dalje publike pas inspektimit në Akademinë e Sigurisë, ministri Saimir Tahiri ka thënë se forcimi i kapaciteteve të policisë dhe kushtet janë në nivele profesionale.
“Ju e dini që prej 10 vitesh akademia nuk funksiononte. Që kur nisëm punën ne besuam se pasurimi i burimeve njerëzore me të rinj dhe të reja në polici ishte hapi i duhur” – tha ministri i Brendshëm.
Ndërkohë, Tahiri nuk i shpëtoi as pyetjes së gazetarëve për debatin e fundit të politikës që lidhet me një pajisje përgjuese në duart e Policisë së Shtetit.
“Për hir të respetit që kam ndaj opinionit publik më duhet të them se Policia e Shtetit nuk ka pasur, nuk ka dhe nuk do të ketë në të ardhmen një pajisje të tillë. Nuk i lejohet me ligj. Ka një trajnim prej disa javësh të firmosur në vitin 2007 përmes një marrëveshje me qeverinë italiane. Bëhet fjalë për një pajisje normale, por jo përgjues” – tha Tahiri.
Ai tha se Policia është transparente ndaj hetimeve dhe verifikimeve ligjore.
“Të gjithë ata që mendojnë se ka diçka të tillë janë të ftuar përmes rrugëve ligjore të hetojnë dhe të shohin nëse unë them të vërtetën. Duhet t’i lejmë thashethemet” – deklaroi ministri i Brendshëm.
javanews/ a.k
