Masa antiterror në të gjitha bankat në Shqipëri. “Gazeta Shqiptare” shkruan se me një udhëzim të Policisë së Shtetit në bashkëpunim me Bankën e Shqipërisë, të gjithë bankat në Shqipëri kanë forcuar masat e sigurisë.
Kontrolli i çantave të femrave, moslejimi i futjes brenda të shisheve, qoftë dhe ato të ujit, si dhe ndalimi i telefonatave janë disa nga masat e marra nga kompanitë private që ruajnë bankat.
Këto institucione janë tepër të frekuentuara nga njerëzit dhe në kuadër të masave antiterror, vëmendje e veçantë i është kushtuar kësaj pjese.
Në vëzhgimin e gazetës, bërë në disa degë bankash, rojet private kanë tolerancë zero dhe nuk lejojnë askënd të flasë në telefon dhe të marrë me vete shishen e ujit. “Mund të jetë dhe molotov, ka ndodhur, apo jo?”, thotë një prej rojeve.
