Emisioni “JAVA” në RTSH ka pasur si temë në pjesën e tij të parë ngjarjet e dhjetorit të vitit 1990. Të ftuar në studio për analistët Lorenc Vangjeli dhe Preç Zogaj kanë qenë të pranishëm Blendi Gonxhj dhe Klajda Gjosha.
Në fjalën e tij, Gonxhja tha se si ish-student i Dhjetorit ndihet i bekuar që i përket atij brezi.
“Për të gjithë ne që kemi qenë në atë periudhë përgjegjësia më e madhe lind nga ajo që ka ndodhur më pas. 27 vitet kanë sjellë për ne mundësi, shance dhe privilegje për të testuar veten nëse ne mund të bënim diçka për vendin. U provuam vite më pas” – tha Gonxhja.
Ai theksoi se shqiptarët u gjendën në një moment të vështirë ekonomik dhe social. Sipas tij, momenti historik i vështirë u kalua pa drama dhe gjakderdhje të mëdha. Gonxhja u shpreh se kalimi i sistemit u bë me zgjuarsi.
Ndërkohë, ish-ministrja e Integrimit, Klajda Gjosha, tha për “JAVA”-n se ishte vetëm 7 vjeç kur kanë ndodhur demonstratat e 8 Dhjetorit, por mbante mend se në njëfarë mënyrë ishte protagoniste pasi u gjend në shesh me familjarë të saj.
“Ajo ditë ishte e panjohur për të gjithë shqiptarët, por e panjohura ishte më e mirë se ajo që po linim pas. Unë isha më shumë e frikësuar sepse nuk e dija çfarë po ndodhte. Por ajo ditë hapi dyert për një Shqipëri të re dhe për të ndërtuar demokracinë. Por për fat të keq edhe poas 27 viteve është larg standardeve” – tha Gjosha në “JAVA”.
Duke folur për hapjen e negociatave në pjesën e dytë të emisionit, ish-ministrja tha se është bërë një punë e jashtëzakonshme gjatë 4 viteve që ajo ka drejtuar Integrimin.
Por Gjosha u tregua skeptike duke thënë se politika ende diskuton sesi ta zgjedhë kryeprokurorin dhe ndërkohë as vettingu nuk ka nisur ende.
“Një takim në Bruksel nuk mund ta shesësh si triumf. Ato janë takime rutinë” – tha Gjosha.
Sipas saj, të gjithë liderët mundohen ta përvetësojnë procesin e integrimit dhe për ta përdorur kundër opozitës.
Ndërkohë sipas Preç Zogajt, integrimi është diçka konkrete.
“Të gjitha palët janë të barabartë para integrimit dhe para tij nuk ka opozitë dhe qeveri. Por ama detyrat i ka kjo e fundit” – tha Zogaj.
***
“Kryeprokurori, kush do të jetë? Kjo ka qenë tema e tretë e emisionit “JAVA”. Duke folur në studio, Lorenc Vangjeli tha se kushtet e vendosura i plotësojnë vetëm 15 prokurorë.
Por sipas insertit në RTSH, vetëm dy prej tyre kanë eksperiencën më të gjatë dhe ata janë Thoma Jano dhe Adnand Kosova.
Gazetari investigativ Artan Hoxha tha se reformanë Drejtësi është kushti themelor dhe zbatimi i saj në terren do të jetë i rëndësishëm për të përcaktuar datën e hyrjës së Shqipërisë në BE.
Hoxha tha se Rama e ka tashmë një listë me emra, sikurse edhe opozita ka pasur preferencat e veta.
“Një nga emrat duke qenë edhe më i vjetri në karrierë është Thoma Jano. Aktualisht është shefi i Përgjimeve në Prokurori” – tha Hoxha duke shtuar se ky emër mund të jetë Kryeprokuror i Përkohshëm.
Ai tha se Adnand Kosova është cilësuar gjithmonë si njeri pranë Partisë Demokratike dhe ka mbajtur postin e zv.ministrit në kohën e Fatos Nanos.
Ndërkohë analisti Lorenc Vangjeli komentoi rolin e misionit OPDAT-EURALIUS dhe kritikat nga opozita për shkelje të sovranitetit.
“Shqipëria është një vend gjithnjë e më pak sovran për të mos lejuar ndëshkimin e mëkatarëve” – tha Lorenc Vangjeli.
