Më 26 mars në stadiumin “PGE Narodowy” në Varshavë, Polonia do të presë Shqipërinë për ndeshjen e play-off që vendos për ekipin që do të kalojë në finalen e play-off, për një biletë në Grupet e Kupës së Botës 2026, që do të zhvillohen këtë verë nga 11 qershori deri më 19 korrik në SHBA, Meksikë dhe Kanada.
Ky takim është një sfidë shumë e rëndësishme për të dyja skuadrat, pasi fituesi do të ketë mundësinë të garojë për më tej, me qëllimin që të marrë pjesë në Kupën e Botës 2026.
Federata polake ka nisur shpërndarjen e biletave për ndeshjen dhe interesimi i tifozëve vendas është jashtëzakonisht i madh. Për shkak të këtij interesi dhe sipas rregullores të UEFA-s, presidenti i federatës polake, Cezari Kuleza, ka vendosur të refuzojë kërkesën e palës shqiptare për të pasur më shumë se 5% të kapacitetit të stadiumit. Kjo do të thotë se tifozët kuqezinj do të kenë në dispozicion vetëm 3000 bileta, pavarësisht përpjekjeve të ambasadores së Shqipërisë në Poloni, Mimoza Halimi, që të takohet me drejtuesit e federatës për të rritur këtë numër në 5000.
FSHF ka siguruar gjithashtu afro 100 bileta të tjera në tribunën VIP për sponsorët dhe zyrtarët e saj, duke bërë që pjesëmarrja e tifozëve shqiptarë të mbetet e limituar. “PGE Narodowy” ka një kapacitet prej 58,580 ulësesh dhe pritet të jetë i mbushur e atmosfera pritet të jetë gjithashtu emocionuese.
Fituesi i kësaj përballjeje do të ndeshet më pas me fituesin e çiftit Ukrainë – Suedi, për një vend në Grupin F të Kupës së Botës 2026. Kjo do të jetë një mundësi historike për Shqipërinë, ndërsa Polonia synon të përfitojë nga mbështetja e fuqishme e tifozëve vendas. Ndeshja pritet të jetë e tensionuar, me emocione të forta dhe taktikë të kujdesshme nga të dyja skuadrat.
