Forcat e Armatosura të Izraelit (Israel Defense Forces – IDF) kanë njoftuar vrasjen e disa luftëtarëve të Hezbollahut gjatë operacioneve tokësore në jug të Libanit, ndërsa operacionet ushtarake vazhdojnë pas sulmeve që grupi nisi kundër Izraelit javën e kaluar.
Sipas një deklarate të ushtrisë izraelite, në një nga incidentet që ndodhi të hënën në mbrëmje, ushtarët e brigadës rajonale “Hiram” (769) vunë re një grup luftëtarësh të Hezbollahut dhe drejtuan një sulm ajror kundër tyre.
Në një incident tjetër të veçantë, një grup “personash të dyshuar që ndodheshin pranë ushtarëve të IDF-së dhe përbënin kërcënim” u godit nga një tjetër sulm ajror, i kryer nën drejtimin e forcave të divizionit rajonal “Galile” (91), sipas ushtrisë izraelite.
Në zonën Rab al-Thalathine, IDF bëri të ditur se forcat e saj panë një grup militantësh duke hyrë në një ndërtesë pranë njësive izraelite.
“Menjëherë pas zbulimit, një tank hapi zjarr ndaj terroristëve dhe i neutralizoi ata,” thuhet në deklaratën e ushtrisë izraelite.
Në një tjetër incident në të njëjtën zonë, IDF njoftoi se goditi një ndërtesë ku ishin mbledhur komandantë të forcës elitë Radvan të Hezbollahut, si dhe një depo armësh.
Ushtria izraelite ka dislokuar forca më thellë në jug të Libanit pasi Hezbollahu ndërmori sulme ndaj Izraelit javën e kaluar, duke argumentuar se qëllimi është “krijimi i një linje mbrojtëse të avancuar që do të sigurojë një shtresë shtesë sigurie për banorët e veriut të Izraelit.”
