Ambasadori Gaiani: Lufta ndaj drogës, një luftë e përbashkët
Në konferencën “Antidroga histori suksesi”, për prezantimin e rezultateteve të arritura nga Policia e Shtetit gjatë këtyre dy viteve në luftën kundër prodhimit dhe trafikimit të lëndës narkotike, mori pjesë dhe ambasadori italian në Tiranë, Massimo Gaiani. Në fjalën e tij, diplomati italian u ndal tek bashkëpunimi i ngushtë mes dy vëndeve.
Sipas tij, Shqipëria dhe Italia ushqejnë marrëdhënie të ngushta mes tyre. “Bashkëpunimi është shtrirë në katër drejtime. Në aspektin teknologjik, logjistik, hetimor, si dhe në atë ekonomik”, tha Gaiani.
Ai bëri të ditur se mes dy vëndeve ka një sinergji pozitive, që lejon forcimin e marrëdhënieve mes palëve. “Ne kemi mundësuar fotografimin nga ajri përmes mjeteve të teknologjisë së lartë dhe Policia Shqiptare ka kryer hetimet dhe ka marrë masat lidhur me parcelat e drogës së identifkuara. Jemi të kënaqur nga rezultatet”, u shpreh Gaiani.
Sipas tij, lufta ndaj drogës nuk prek vetëm Shqipërinë, por edhe vëndet e tjera. “Është një luftë e të gjithëve. Të gjithë duhet të jemi vigjilent lidhur me këtë fenomen, prandaj dhe bashkëpunimi duhet të jetë gjithnjë e më shumë në ngritje”, përfundoi Gaiani, duke garantuar vijueshmëri të bashkëpunimit.
