24-vjeçari Aleksandër Krrashi, drejtuesi i betonierës që mendohet të ketë shkaktuar aksidentin fatal në aksin Vorë-Fushë Prezë, ka dhënë deklaratën e tij të parë para hetuesve lidhur me ngjarjen tragjike që ndodhi më 19 mars, ku humbën jetën 4 të rinj.
Në dëshminë e tij, Krrashi ka shpjeguar se ndalimi i betonierës në rrugën kryesore ndodhi për shkak se i kishte mbaruar karburanti, por ai kishte harruar të ndizte bllokazhin e makinës.
“Ishim tre betoniere në radhë, unë parakalova dy të tjerët. Duke ecur, mu fik mjeti dhe kuptova se kishte mbaruar karburanti. Për këtë arsye e kisha ndalur betonierën,” ka thënë Krrashi gjatë dëshmisë së tij.
Sipas hetimeve, ndalimi i betonierës në rrugën kryesore, në orët e vona të natës dhe me bllokazhin fikur, ka shkaktuar aksidentin tragjik. Makina tip “Mercedes Benz” me të cilën udhëtonin 4 të rinjtë dyshohet të ketë udhëtuar me shpejtësi tej normave të lejuara dhe ka goditur nga pas betonieren, duke shkaktuar shpërthimin dhe përfshirjen nga flakët të automjetit.
Nga goditja, drejtuesi i mjetit dhe 3 pasagjerët humbën jetën. Hetuesit kanë konfirmuar se shoferi i betonierës, Aleksandër Krrashi, nuk dispononte patentë për drejtimin e këtij mjeti, dhe gjithashtu, betonierja u largua nga vendi i aksidentit pas ngjarjes.
Policia po vijon hetimet për të sqaruar rrethanat e plota të aksidentit dhe veprimet e shoferit të betonierës.
