Heqja e mandati të kryebashkiakut për Fredi Belerin dhe mbajtja e zgjedhjeve të reja në Himarë, ka shkaktuar zemërim në Athinë.
Ndonëse vetë qeveria ishte e përmbajtur në reagimin e saj zyrtar, nuk ka ndodhur kështu me mediat vendase. Janë pa fund portale, televizione dhe gazeta që kanë vjellë vrer, duke “futur hundët” sërish në punët tona. “Ekathimerini” është ndër mediat më të flakta pro Belerit, e cila e trajton Himarën si tokë greke.
Në një artikull të publikuar pak më parë, kjo media vijon të pretendojë për parregullsi dhe se Fredi Belerit si drejtësia ashtu dhe KQZ janë duke i rënë në qafë kot.
“Vendimi i Komisionit Qendror të Zgjedhjeve të Shqipërisë për të hequr Fredi Belerin nga posti i kryetarit të Bashkisë së Himarës, në të cilin ai u zgjodh por nuk u betua kurrë, përfundon një cikël 14 mujor të parregullsive nga qeveria e Edi Ramës me qëllim diskreditimin e të burgosurve etnikë grekë, i cili është gjithashtu një eurodeputet që përfaqëson Demokracinë e Re në pushtet në Greqi”, shkruan media greke.
Më tej ajo kapet me procedurat. Sipas medias greke, Beleri kishte 30 ditë kohë të ankimonte vendimin, por KQZ dhe Presidenti nuk humbën kohë dhe vendosën që të kemi zgjedhje të reja.
“Vullneti i Tiranës për ta çuar çështjen në një përfundim të shpejtë duket edhe nga fakti se, megjithëse ka një periudhë ankimimi 30-ditor pas vendimit të së premtes, qeveria shqiptare i paraqiti një kërkesë të menjëhershme presidentit të vendit Bajram Begaj për mbajtjen e zgjedhjeve të reja në Himarë. Fakti që Begaj e pranoi menjëherë kërkesën dhe vendosi të kemi zgjedhje më 4 gusht, lë të kuptohet se e gjithë kjo aferë ishte e orkestruar nga qeveria shqiptare”, shkruhet në artikull.
Sipas medias greke, marrëdhëniet greko-shqiptare kanë arritur në nivelin më të ulët prej dekadash gjatë 14 muajve të fundit dhe mbetet për t’u parë nëse qeveria ‘Rama’ do ta lejojë Belerin të marrë pjesë në seancën e parë plenare të Parlamentit Evropian më 16 korrik në Strasburg.
“Një vendim për të lejuar Belerin, i cili u zgjodh si eurodeputet muajin e kaluar, të merrte pjesë në Parlamentin Evropian, ose, më e rëndësishmja, për ta liruar nga burgu pasi ai tashmë ka vuajtur një pjesë të konsiderueshme të dënimit të tij dyvjeçar, do të kishte dhënë disa sinjal për depërshkallëzimin nga ana e Tiranës, por përvoja e 14 muajve të fundit sugjeron të kundërtën. Ministria e Jashtme greke theksoi “detyrimin” e autoriteteve shqiptare për të marrë të gjitha masat e nevojshme për t’i mundësuar Belerit të marrë pjesë në punimet e Parlamentit Europian, duke filluar me seancën plenare të 16 korrikut”, përfundon artikulli.
