A duhet t’i lutet Rama opozitës për reformën?

Nga Skënder Minxhozi/

Duket se një lutje publike që kryeministri Rama i ka bërë të mërkurën opozitës për të kaluar së bashku paketën kushtetuese të reformës në drejtësi, ka nxjerrë më në fund atë që është sot pozicioni zyrtar i Partisë Demokratike në lidhje me këtë proces. Pas lutjes së Ramës, Lulzim Basha ka deklaruar se primare mbetet reforma zgjedhore dhe se reforma në drejtësi nuk ka asnjë shans që të hyjë në fuqi para zgjedhjeve të vitit të ardhshëm. Këto deklarata të Bashës vinin pas replikave të ashpra që ai dhe përfaqësuesi i opozitës në komisionin e reformës Bylykbashi, patën me zv.ambasadorin amerikan, i cili tha ditë më parë se nuk ka më kohë për ndryshime thelbësore dhe se reforma duhej votuar sa më shpejt.

Afrimi i fundit të diskutimit të paketës kushtetuese në komisionin Xhafa, e ka sjellë procesin e gjatë thuajse dyvjeçar në atë që mund të quhet edhe si “gryka e shishes” e reformës në drejtësi. Pra, në atë që tashmë përbën pikën e moskthimit, momentin e të vërtetës dhe të zbulimit të pozicioneve reale të palëve, në lidhje me paketën në fjalë. Tashmë hapësira për të manovruar, për t’u fshehur pas deklaratave boshe, pas retorikës së thatë politike, është bërë tejet e vogël. Ose me reformën, ose kundër saj. E thënë ndryshe, ose me draftin e dakordësuar në Venecia dhe të retushuar nga ekspertët ndërkombëtarë, ose me hedhjen në erë të të gjithë procesit.

Opozita ka propozuar kohë pas kohe amendime, teza dhe ide nga më të ndryshmet lidhur me reformën. Ndryshime dispozitash, shkrirje institucionesh që ndryshojnë arkitekturën e paketës së propozuar, mosprekje të kompetencave të presidentit, ruajtje të KLD, shtyrje të afateve të formimit të strukturave të reja dhe mosprekje të mandateve egzistuese për disa struktura aktuale. E gjitha kjo i përket së shkuarës. Tashmë reforma është në tavolinë, në formën që i ka dhënë Komisioni i Venecias. Cilado palë që kërkon të prekë atë format, ka marrë mesazhin nga partnerët, se është kundër vetë reformës.

Lutja publike e Ramës për Bashën tingëllon më shumë si një provokacion, i cili de facto e dha efektin, duke shkaktuar reagimin e kreut të opozitës. Nëse PD do t’i qëndrojë besnike deri në fund atij qëndrimi të Bashës, i bie që reforma të bjerë ende pa e parë sallën plenare të Kuvendit të Shqipërisë. E gjitha kjo, nëse maxhoranca nuk vendos të luajë zarin e fundit, që është në fakt një lojë e vogël bllofi, duke e çuar draftin në seancë edhe pa premtimin e opozitës për ta votuar paketën. Ndoshta kjo lëvizje e fortë mund të prodhojë situata të paparashikuara në Kuvend, ku opozita do të ndjehet pa dyshim nën trysninë e fortë publike (dhe atë ndërkombëtare), për të mos e rrëzuar paketën kushtetuese. Pak a shumë ajo çfarë propozoi pak orë më parë ish-presidenti Topi.

Megjithatë mbetet ende edhe një muaj nga afati virtual i vendosur nga amerikanët, për ta parë të votuar reformën në drejtësi. Në një muaj politika shqiptare mund të bëjë çudira dhe lutja e Ramës mund të shkojë dëm, siç duket se ka ndodhur deri tani.