Humbja me Poloninë la një shije të hidhur, pasi Kuqezinjtë shënuan të parët, por e pësuan nga gabimet në pjesën e dytë. Gjithësesi, për ish-sulmuesin Altin Rraklli, duhet menduar që në miqësoren e së martës me Ukrainën të shfrytëzohen për lojtarë të rinj.
“Unë them që i kemi të gjitha mundësitë që të shikojmë përpara. Ekipi u përfaqësua shumë mirë. Pilo ishte një element i ri që mua më pëlqeu shumë, pavarësisht rastit që humbi. Lojtarët e rinj që kemi duhet t’i japim shansin për këtë ndeshje, sepse miqësoret janë për këtë qëllim”, tha Altin Rraklli, ish-futbollist i Kombëtares.
Rraklli, i cili ka luajtur mbi 60 ndeshje me Kombëtaren duke shënuar 11 gola, komentoi për TV Klan edhe për ardhmen e Sylvinho.
“Nëse unë do të isha Sylvinho, do ta mbyllja me Shqipërinë dhe do të kërkoja diçka tjetër. Patjetër që ka bërë një punë të konsiderueshme dhe ndoshta ka dëshirë të vazhdojë”, shtoi Rraklli.
Sylvinho është nën kontratë deri në fund të qershorit. Ndeshja me Ukrainën do të luhet të martën prej orës 20:45 në stadiumin e Levantes.
