Me rastin e 65-vjetorit të masakrës pa gjyq të 22 intelektualëve të pafajshëm, me pretekstin e bombës në Ambasadën Sovjetike më 22 shkurt 1951, sot paradite në Institucionin e Presidentit të Republikës, u zhvillua Konferenca Ndërkombëtare. Në këtë konferencë merrnin pjesë familjarë të viktimave të pafajshme të terrorit komunist; merrnin pjesë Ambasadori i OSBE-së Florian Raunig; Ambasadori gjerman Hellmut Hoffman; Drejtoresha Ekzekutive e Fondacionit Shtetëror Gjerman mbi Trajtimin e Periudhës së ish-diktaturës Komuniste Dr. Anna Kaminsky, e cila ishte e Ftuar Nderi; Drejtori Ekzekutiv i Institutit të Studimeve të Krimeve dhe Pasojave të Komunizmit Agron Tufa, etj.
“Ka një realitet
diametralisht të kundërt të asaj kohe të dhimbshme, të tmerrshme dhe barbare, në krahasim me ditët e sotme. Nëse Presidenti i asaj kohe, Omer Nishani, dekretonte
ekzekutimet e atyre njerëzve, – natyrisht përveç koincidencës së mbiemrit, nuk ka asnjë lidhje mes nesh – sot Institucioni i Presidentit të Republikës është i juaji. Është i juaji për të dhënë mesazhin se ne nuk harrojmë”, tha Presidenti Nishani.
Për Presidentin Nishani, “harrimi që sugjerojnë moralistët e vonuar, apologjetë të maskuar të diktaturës, të cilët nga njëra anë predikojnë harrimin e krimeve, dhe nga ana tjetër paraqesin me një mijë mënyra një të kaluar si u intereson atyre, nëpër ekrane të caktuara, kujtime kriminelësh nëpër gazeta, harrim që kurrsesi nuk duhet injoruar dhe toleruar. Jo, ne themi nuk harrojmë! Nuk mund të harrojmë. Nuk duhet të harrojmë! Nuk kemi arsye të harrojmë”.
