6 aktivistë të shoqërisë civile janë liruar nga ambientet e komisariatit nr1, pas disa orësh qëndrimi. 10 të tjerë ndodhen ende ne komisariat. Njëri prej aktivistëve, Elian Tanini, i cili u arrestuar pasdite, pasi protestuesit bllokuan rrugën përballë komisariatit, tha se protestat do të vijojnë dhe se parku do të mbrohet. Tanini tha se asnjë nga protestuesit e shoqërisë civile nuk ka goditur efektivin e policisë bashkiake, ndërsa një tjetër aktiviste, ka thënë se ka qenë pranë efektivit dhe atij i kanë rënë të fikët.
“E rëndësishme që parku do të mbrohet me shpirt dhe dashuri nga banorët e tiranës. Si mund të arrestohen disa të rinjqë ishin atje për të mbrojtur parkun. Ka pas një sjellje të cuditshme. Ne nuk jemi aktivistë të partive të ndryshme. E paimagjinueshme që të rinjtë, në 2016 të tërhiqeshin zvarrë. Efektivët ishin atje për të na shtyrë neve. Nuk ka asnjë provë që të na implikojë neve. Në ambientet e shoqërimit janë sjellë në mënyrë flagrante. Na tërhoqën zvarrë brenda.”- tha Eljan Tanini.
“Kam qenë pranë ku është rrëzuar efektivi i policisë… dhe kam dëgjuar shokët e tij policë që thonin i ranë të fikët i ranë të fikët.”- tha aktivistja.
I pranishëm në komisariat ishte dhe analisti Fatos Lubonja, i cili ka mbështetur aktivistët.
“Gjëja e parë që më tmerroi ishte se atje kishte më shumë policë sesa protestues. Policia duhet të mbrojë protestuesin dhe jo atë ndërtim që është pa leje. Është krim ndaj qytetit që të shpenzosh 600 mijë euro atje, aty ku ka pemë dhe park. Ky është krimi, injoranca, klientelizmi, që janë bashkuar bashkë.
Tjetra pastaj është dhuna ndaj shoqërisë civile, pikë së pari sic e thashë, një dhunë vizuale. Aty bëhej fjalë që ishte edhe policia bashkiak, e cila nuk ka të drejtë të ushtrojë dhunë, nuk ka të drejtë të ushtrojë ato kompetenca që i ka policia rendit. Ky është një fashizëm, sic e kanë quajtur protestuesit, unë e kam quajtur fashizëm ekonomik. Kjo dhunë është fashiste dhe mendoj unë kjo do rezistencë, derisa këtyre tu bie tuneli mbi kokë”- tha Lubonja.
