Zgjedhjet në Itali konfirmuan atë që përbën një prej shqetësimeve kryesore në politikën evropiane, rritjen me shpejtësi të partive populiste si nga e djathta po ashtu edhe nga e majta.
Asnjë fitues i qartë në zgjedhjet parlamentare në Itali, por ajo që mund të themi është se me rezultatet paraprake pritet një periudhë e trazuar politike, pa një mazhorancë të konsoliduar në numra.
Fitueja e madhe e këtyre zgjedhjeve, edhe pse nuk formon dot shumicën, është Lëvizja 5 Yjet e drejtuar nga Luigi Di Maio. Kjo parti ka dalë forcë e parë, edhe pse numërimi vijon ende.
Si parti udhëheq ‘Lëvizja Pesë Yjet’ me 31%, ndërsa qendra e djathtë si koalicion është në avantazh me 37.64%, e ndjekur nga qendra e majtë me 23.61%, më pas vjen me ‘Liri dhe Barazi’ me 3.38%.
Por kur duhen edhe 1/4 e fletëve të votimit për t’u numëruar, do të jetë shumë e vështirë që ndonjëri nga koalicionet të qeverisë i vetëm vendin, pa krijimin e një koalicioni më të gjerë, pasi nuk arrijnë dot të sigurojnë mazhorancën parlamentare./a.m.
