Pak ditë pas ekstradimit në Itali të 48-vjeçarit nga Burreli, Gani Doku, mediat e këtij shteti i kanë bërë një portret të plotë liderit të bandës që administronte jo pak, por 70 prostituta.
Kështu, “Milanotoday” shkruante dje historinë e organizatës shqiptaro-rumune, ku përmenden me detaje elementët përbërës të saj. Banda u shkatërrua në mes të marsit të këtij viti, gjatë operacionit “Alba nostra 2”, të zhvilluar në Itali dhe Shqipëri. Referuar mediave italiane, të cilat e quajnë një sukses ekstradimin nga Shqipëria, të udhëheqësit të bandës famëkeqe të përfshirë në shfrytëzimin e prostitucionit, kjo organizatë administronte prostitucionin e më shumë se 70 vajzave.
Gani Doku, lindur në Burrel, është arrestuar në shtëpinë e tij më 10 mars të këtij viti. Vajzat ishin rekrutuar në vende të ndryshme, jo vetëm në Rumani dhe Shqipëri, por edhe në Gjermani dhe Belgjikë. Aktiviteti u degëzua në shumë krahina të ndryshme italiane. Vajzat, në muajt e verës, dërgoheshin në qytetet bregdetare të njohura të gadishullit, në mënyrë që të mos “zvogëlonin biznesin”. Pas operacionit të parë (“Alba Nostra”), Gani Doku kishte zëvendësuar shqiptarin tjetër H. Domi.
Ky i fundit ishte lënë në arrest shtëpie dhe arriti të arratisej, për t’u vënë sërish në krye të organizatës, duke u marrë personalisht me mbledhjen e parave nga duart e prostitutave. Gani Doku ishte edhe “pronari” i “të drejtave të sipërfaqes” të seksionit rrugor në të cilin më parë kishte punuar Amalia Murgu, shtetasja rumune, e cila u vra më maj të 2012-s, gjatë hetimit që çoi në aksionin “Alba Nostra”. Krimi kishte vënë në “krizë”, organizatën, sepse disa nga anëtarët e klanit shqiptaro-rumun u larguan nga Italia. Ditën e aksionit “Alba Notstra 2” policia italiane publikoi një video ku shfaqej një prostitutë shqiptare, e cila e vënë në përgjim ambiental shpjegonte se zëvendësonte dikë tjetër.
