Një shumë prej 3.2 milionë eurosh cash është sekuestruar nga autoritetet italiane gjatë një operacioni kundër grupeve të dyshuara të Camorra-s në zonën e Napolit.
Paratë u gjetën të fshehura brenda mureve të një apartamenti në Via Atellana, në Caivano. Pamjet e publikuara nga Karabinierët tregojnë momentin kur efektivët përdorin çekiçë për të shembur muret, ku ishin fshehur kartëmonedhat.
Shuma, e përbërë kryesisht nga kartëmonedha 50-euroshe, ishte mbështjellë me kujdes me celofan dhe ishte vendosur në kova plastike. Bashkë me paratë, në apartament u gjetën edhe ora luksoze.
Operacioni çoi në arrestimin e 34 personave, 23 prej të cilëve u dërguan në burg, ndërsa 11 të tjerë u vendosën në arrest shtëpie.
Sipas Karabinierëve, hetimi lidhet me veprimtari të dyshuara për trafik droge dhe zhvatje. Të dyshuarit akuzohen gjithashtu për komplot të armatosur të stilit Camorra, posedim të lëndëve narkotike me qëllim trafikimin dhe vepra të kryera me metoda mafioze.
Autoritetet italiane bëjnë me dije se grupi dyshohet se drejtohej nga klani Angelino, i cili vepron në zonat e Caivano dhe Casoria. Operacioni u zhvillua nga njësia hetimore e Castello di Cisterna, në bashkëpunim me njësitë operative të Caivano dhe Casoria, nën drejtimin e Prokurorisë së Napolit dhe Drejtorisë së Qarkut Anti-Mafia.
