Këtë të mërkurë grupi parlamentar i Partisë Socialiste zhvilloi një dëgjesë me rektorin e UBT-së, Fatbardh Sallaku pas masave të sigurisë për 24 zyrtarë të universitetit.
Në fjalën e tij, kryeministri Edi Rama u shpreh se Sallaku vetë nuk është nën hetim dhe edhe para se të kandidonte për rektor i ka drejtuar një letër SPAK-ut që i ka sqaruar se mund të vazhdonte me kandidimin.
Kreu i qeverisë u shpreh se shqetësimi për këtë rast lidhet më nxitimin për të deklaruar 24 persona në masë sigurie, në një kohë kur universiteti është në një kthesë historike.
Rama theksoi se gjëja i parë që i shkoi në mendje ishte se çfarë do mendonin partnerët austriakë kur të dëgjonin një lajm të tillë.
Kryeministri tha se nuk ka arsye për të bllokuar punën ndërkohë që drejtësia do të bëjë punën e vet.
“Dhe e treta, të gjithë duhet ta kuptojnë që shqetësimi shumë i madh në këtë rast nuk lidhet fare me faktet apo me fajësinë apo pafajësinë e personave, por lidhet me nxitimin për të deklaruar 24 persona në masë sigurie për një universitet që është në një kthesë historike dhe që e ka të ardhmen e vet të varur nga një partneritet strategjik me një ndër universitetet më të vjetra të botës. Padyshim që gjëja e parë që mua më ka shkuar në mendje kur kam marrë këtë lajm është çfarë do mendojnë partnerët austriakë kur ta dëgjojnë. 24 vetë në masë sigurie, një numër marramendës për një çështje që ka dy a tre vjet dhe që s’ka asnjë lloj flagrance, s’ka asnjë lloj arsye për të krijuar këtë lloj goditje për një Institucion të Arsimit të Lartë. Aq më tepër që bëhet fjalë për fonde të kërkimit shkencor ku nëse ka pasur abuzime, abuzuesit duhet të përgjigjen deri në fund, por 24 vetë në masë sigurie? Kjo besoj është e mjaftueshme sa i përket konkretisht çfarë tha rektori dhe i gjithë shqetësimi është për të dhënë mesazh për prindërit, studentët, partnerët që ndërkohë që drejtësia do të bëjë punën e vet nuk ka arsye për të bllokuar punën. Besoj që mund ta falenderojmë rektorin për praninë. Tani ne mund të vazhdojmë se kam disa fjalë të tjera për të ndarë, por duke qenë se rektorin e kemi dhe pak demokrat është mirë ta lemë të lirë që të vazhdojë punën”, tha Rama.
