Plot 221 ndërmarrje shoqërore (NSH) në gjithë territorin e Kosovës janë duke u shfrytëzuar nga mashtrues të ndryshëm.
Para pak kohësh gazeta “Zëri” në bazë të një hulumtimi ka gjetur se zyrtarë të lartë të institucioneve të vendit, por edhe persona të tjerë të lidhur me politikën nga mbarimi i luftës, por edhe aktualisht mbajnë të uzurpuar pronën shoqërore, duke përfituar shuma të mëdha parash në emër të qirasë.
Të mërkurën, AKP-ja ka publikuar listën e plotësuar të ndërmarrjeve shoqërore që janë duke u shfrytëzuar nga uzurpatorët.
Në deklaratën për media thuhet se Agjencia Kosovare e Privatizimit, në vazhdën e publikimeve të informatave për procesin e zhvilluar të privatizimit të ndërmarrjeve shoqërore në Republikën e Kosovës, publikoi raporte të plotësuara me informata për asetet e ndërmarrjeve shoqërore që aktualisht shfrytëzohen nga palë të ndryshme.
