2030 viti i integrimit? Von der Leyen: Ballkani Perëndimor të zgjedhë, Rusi apo BE

A do të jetë 2030 viti në të cilin vendet e Ballkanit Perëndimor do ti bashkohen Bashkimit Europian? Kjo ishte pyetja të cilës kancelari gjerman Scholz iu përgjigj në konferencën e përbashkët me kryeministrin Edi Rama dhe me presidenten e Komisionit Europian, Ursula Von der Leyen.

Ai tha se në këto 20 vite duhet të ishte bërë diçka më shumë për Ballkanin Perëndimor, ndërsa shtoi se “ëndrra europiane” e këtyre vendeve mund të arrihet vetëm duke punuar fort.

“Mendoj se është një gabim që pasi jemi takuar në Selanik gati 20 vite më parë nuk është bërë diçka më shumë në Ballkanin Perëndimor. Ne duhet të punojmë më shumë, pasi të gjithë kemi të njëjtën pikëpamje.

Ne duhet të punojmë fort për ta arritur këtë, por edhe vendet aspirantë duhet të bëjnë hapat e duhur që ta bëjnë të mundur këtë. Ka një ëndërr europiane në këto vende, por duhet të punoni më shumë. Ju keni pritur shumë, por tashmë është koha që të punojmë të gjithë së bashku”,-tha kancelari i Gjermanisë, Olaf Scholz.

Von der Leyen nga ana tjetër tha se po punohet për raportin që publikohet çdo vit për vendet aspirantë të BE, por i takon kësaj të fundit të vendos.

Ajo tha gjithashtu se vendet e Ballkanit Perëndimor duhet të bëjnë një zgjedhje të qartë nëse janë me Bashkimin Europian apo me Rusinë, pasi sipas saj, lufta në Ukrainë tashmë ka ndryshuar gjithçka.

“Ne jemi duke punuar për raportin që publikohet çdo vit për vendet aspirantë që do t futen në Bashkimin Europian. Është Bashkimi Europian që do të vendos. Lufta mes Ukrainës dhe Rusisë ndryshoi gjithçka, këto vende tashmë duhet të vendosin nuk mund të jenë më mes Bashkimit Europian dhe Rusisë, duhet të bëjnë një zgjedhje. Gjithashtu duhet të vazhdojnë edhe me reformat e kërkuara. Për mua është e rëndësishme “të bëjmë detyrat” dhe të kapim e të shfrytëzojmë këtë moment historik.

Sa i përket vitit 2030, nuk mund të ketë një datë të saktë, të prerë, pavarësisht reformimit apo jo. Kjo nuk do të jetë asnjëherë e pranueshme për vendet anëtare, por ju duhet të prisni deri në një datë të caktuar. 2030 do të thotë mandati tjetër jo pranimi, metodologjia e përbashkët që kemi pranuar me Këshillin Evropian, është një proces me meritë dhe është më përfituese për vendet gjithashtu, sepse janë përpjekjet dhe sukseset e tyre që i çojnë përpara dhe gjithashtu për t’i shtyrë për të marrë hapat e nevojshme.

Është e bazuar në meritë. Nëse merrni përsipër reformën, do merrni financime dhe fonde. Është një proces tepër i saktësuar dhe kjo është metodologjia që kemi pranuar”, theksoi ajo./m.j