Tiphaine Auziere, vajza 42-vjeçare e Zonjës së Parë të Francës, Brigitte Macron, ka konfirmuar lidhjen e saj me Antoine Lecomte, një student 22-vjeçar i shkollës së biznesit. Çifti ka ndarë momente nga pushimet e tyre në Amsterdam, duke bërë publike romancën që ishte raportuar për herë të parë muajin e kaluar.
Auziere publikoi në rrjetet sociale fotografi dhe pamje nga udhëtimi i tyre drejt Holandës, ku çifti udhëtoi me një furgon dhe qëndroi në Hotel Faralda, një strukturë e veçantë e ndërtuar mbi një vinç rreth 50 metra të lartë në portin e Amsterdamit.
Në pamje, ata shfaqen duke shëtitur në qytet dhe duke vizituar ekspozita. Lecomte e përshkroi udhëtimin me shprehjen: “48 orë në ‘Dam me Zonjën’”.
Diferenca prej 20 vitesh në moshë mes çiftit ka tërhequr vëmendjen e mediave franceze, të cilat e kanë krahasuar në mënyrë të pashmangshme marrëdhënien me historinë e Brigitte Macron dhe presidentit francez, Emmanuel Macron.
Brigitte Macron, sot 73 vjeç, ishte 40 vjeç kur nisi marrëdhënien me Emmanuel Macron, i cili në atë kohë ishte 15 vjeç. Çifti u martua më vonë dhe Emmanuel Macron u bë president i Francës.
Tiphaine Auziere, më e vogla e tre fëmijëve të Brigitte Macron, thuhet se u njoh me Lecomte gjatë verës në Le Touquet, një prej destinacioneve të preferuara të familjes Macron në bregdetin francez.
Lecomte, nga Lille, është kitesurfer, instruktor e-foil dhe student në Shkollën e Biznesit Neoma. Ai zotëron gjithashtu kompaninë e sporteve ujore Mission Kiteboarding.
Miq të çiftit kanë thënë për mediat franceze se lidhja mes tyre ka qenë e menjëhershme dhe se të dy ndajnë interesa të përbashkëta, përfshirë dashurinë për Le Touquet, udhëtimet, sportet dhe sipërmarrjen.
Sipas raportimeve, Brigitte Macron e ka mirëpritur lidhjen e vajzës së saj. Një mikeshë e Auziere i tha revistës Gala se për të “e tëra që ka rëndësi është lumturia e vajzës së saj”.
Auziere e ka prezantuar tashmë Lecomte me dy fëmijët e saj, Élise dhe Aurèle, nga ish-partneriteti i saj civil me Antoine Choteau, një gastroenterolog. Sipas Gala, ajo nuk e kishte bërë më parë këtë me partnerët e saj të tjerë.
Lidhja e re vjen disa muaj pas ndarjes së Auziere nga Cyril Hanouna, figurë e njohur e televizionit francez dhe kritik i shpeshtë i Emmanuel Macron. Auziere kishte qenë më parë komentatore ligjore në programin televiziv të Hanouna-s, përpara se të nisnin lidhjen vitin e kaluar. Çifti thuhet se u nda në maj, por ruajti marrëdhënie të mira.
Përveç profesionit si specialiste e së drejtës së punës, Auziere është edhe autore. Në vitin 2024 ajo publikoi romanin e saj të parë, “Assises”, një dramë gjyqësore që trajton historinë e një gruaje të akuzuar për vrasjen e partnerit të saj të dhunshëm.
Ajo është përfshirë edhe për një periudhë të shkurtër në politikë. Në vitin 2017, Auziere kandidoi në zgjedhjet parlamentare si bashkëpunëtore e Thibaut Guilluy, kandidat i partisë së sapokrijuar të Emmanuel Macron, La République en Marche, në zonën e Le Touquet.
Vetë Auziere ka folur më herët për ndikimin që pati marrëdhënia e nënës së saj me Emmanuel Macron në familje. Në vitin 2024, ajo tha për Paris Match se ndarja e prindërve të saj ishte e dhimbshme, por se me kalimin e kohës kishte mësuar të “ecte përpara pavarësisht kritikave”.
Ndërkohë, lidhja e saj me Lecomte ka rikthyer në vëmendje historinë e pazakontë të familjes Macron, këtë herë për shkak të një tjetër diference të madhe në moshë mes partnerëve.
Brigitte Macron’s daughter has found love with a man nearly half her age.
Tiphaine Auzière, 42, confirmed her relationship with 22-year-old kitesurfer Antoine Lecomte with a series of photos from a romantic break in Amsterdam.
Our correspondent has more details ⬇️… pic.twitter.com/FiS4QWTDWS
— The Telegraph (@Telegraph) September 1, 2026
