Ministri i Turizmit, Kulturës dhe Sportit, Blendi Gonxhja, ka bërë me dije se gjatë këtij sezoni turistik është rritur ndjeshëm numri i parcelave të dedikuara për plazhet publike në të gjithë vendin.
Përmes një reagimi në Facebook, Gonxhja tha se këtë sezon numri i parcelave të stacioneve të plazhit publik është rritur me 67%, ndërsa sipërfaqja e tyre është zgjeruar me mbi 10%.
Sipas ministrit, zgjerimi i hapësirave publike synon t’u japë më shumë akses qytetarëve dhe turistëve, ndërsa njëkohësisht të krijojë alternativa me çmime më të përballueshme dhe të kufizojë hapësirën e zënë nga stacionet private.
Një risi këtë sezon, sipas ministrit, është edhe ofrimi i çadrave dhe shezlongëve në plazhet e menaxhuara nga bashkitë, me tarifa të miratuara nga këshillat bashkiakë.
“Këtë sezon kemi rritur me 67% numrin e parcelave të stacioneve të plazhit publik dhe me mbi 10% sipërfaqen e tyre në të gjithë vendin, duke i marrë terren stacioneve private. Më shumë plazhe publike, më shumë akses, cilësi dhe çmime të përballueshme për banorët e zonave por edhe për turistët e shumtë që zgjedhin Shqipërinë. Për herë të parë, plazhet e menaxhuara nga bashkitë ofrojnë edhe çadër e shezlong me tarifa të miratuara nga këshillat bashkiakë, duke ndihmuar njëkohësisht në frenimin e abuzimeve me çmimet”, shkruan Gonxhja.
Ministri ka veçuar Sarandën si një prej bashkive ku modeli i menaxhimit të plazheve publike po jep rezultate konkrete.
“Në Sarandë, sikurse në disa bashki, kemi sot nga modelet më të mira të këtij menaxhimi. Rezultatet janë të prekshme, por puna vazhdon”, shkruan ai.
