Pensionistët në të gjithë vendin do të përfitojnë edhe këtë vit shpërblim për festat e fundvitit. Ministri i Financave, Arben Ahmetaj, konfirmoi në Komisionin e Ekonomisë vazhdimin e paketës së solidaritetit për pensionistët, pasi, siç tha ai, kjo është vendosur edhe në programin e qeverisë.
Po ashtu, nga muaji maj 2018 pensionistët do të përfitojnë edhe rritjen e pensionit. Ministri Ahmetaj shpjegoi se fondi do të jetë 1,8 miliardë dhe indeksimi i pensioneve do të jetë më i lartë se norma e inflacionit. Për rritjen e pagave, kreu i Financave konfirmoi rritjen 5 për qind për infermierët, mjekët dhe arsimtarët.
PENSIONET E SHPËRBLIMET
Rreth 650 mijë pensionistë në të gjithë vendin do të përfitojnë edhe këtë vit shpërblimin e fundvitit. Ministri i Financave, Arben Ahmetaj, deklaroi dje në Komisionin e Ekonomisë vazhdimin e paketës së solidaritetit. “Për pensionistët, sigurisht që do të vazhdojmë politikën e bonusit që kemi vendosur në programin e qeverisë”, u shpreh ministri.
Qeveria vjet me paketën e solidaritetit shpërndau shpërblime për pensionistët në qytet, në fshat, për personat që marrin trajtim të veçantë nga puna në miniera, për ish-ushtarakët dhe pensionistët që marrin pension nga puna e kryer në miniera. Me buxhetin e 2018-s, fondi për rritjen e pensioneve do të jetë 1,8 miliardë lekë.
Ministri Ahmetaj deklaroi se rritja do të nisë në muajin maj dhe do të jetë më e lartë se inflacioni. “Me fondin 1,8 miliardë lekë, besoj se do të kemi një indeksim më të lartë sesa inflacioni i shportës, duke nisur nga muaji maj”, shpjegoi Ahmetaj.
PAGAT
Me buxhetin e 2018-s, qeveria do të shpenzojë 1 miliard lekë fonde për rritjen e pagave. Ministri Ahmetaj tha se rritja do të jetë 5 për qind dhe përfitues do të jenë mjekët, infermierët dhe mësuesit.
“Në 2017 vetëm rritja e pagave shkoi 5,5 miliardë lekë në 10 muaj dhe efekti vjetor 7,2 miliardë i trashëgohet 2018. Kemi thënë që do të rrisim pagën e mjekëve, infermierëve dhe të arsimtarëve me 5 për qind. Këto kategori kemi marrë përsipër, këto do t’i rrisim deri në 40 për qind”, u shpreh ministri.
a.ç
