Në Kosovë, 1.9 milion qytetarë me të drejtë vote iu drejtuan sot kutive të votimit për zgjedhjen e 120 deputetë të rinj të legjislaturës së shtatë të Kuvendit.
Për zgjedhjet parlamentare ishin regjistruar pranë Komisionit zgjedhor 25 subjekte politike kurse për vëzhgimin e procesit u angazhuan rreth 3500 vendas dhe ndërkombëtarë.
Në përfundim të procesit zgjedhor, sipas KQZ, votuan 41.38% e qytetarëve. Pas mbylljes së qendrave të votimit, nuk kanë munguar as rezultatet e para të Exit Poll-eve. Sipas atij të realizuar nga Klan Kosova, PDK ka marrë 22%, LDK 30%, VV 30 dhe PSD 10%.
Me nisjen e procesit zgjedhor, Albin Kurti, Vjosa Osmani, Ramush Haradinaj, Kadri Veseli dhe Fatmir Limaj, të pestë kandidatë për Kryeministër të Kosovës, kanë votuar duke përcjellë dhe mesazhet e tyre politike.
Presidenti i Kosovës, Hashim Thaçi tha se “Kosova do të zgjedh legjislaturën e re, që do të nxjerrë edhe qeverinë e re të Kosovës, e cila duhet të përmirësojë jetën e qytetarëve dhe do të përballet me sfidat që kemi përpara.
Ramush Haradinaj, i shoqëruar nga bashkëshortja e tij, pasi votimit, i ka cilësuar zgjedhjet si shumë të rëndësishme, ndërsa iu bëri apel qytetarëve të dalin masivisht për të votuar.
Kandidatja për kryeministre e Lidhjes Demokratike të Kosovës, Vjosa Osmani, u shpreh para gazetarëve se dita e sotme është historike për Kosovën. Ajo gjithashtu bëri apel për një proces të rregullt.
Kryetari i PDK-së, Kadri Veseli, pas votimit, në një deklaratë për mediat uroi që përmes votës, qytetarët t’i japin perspektivë perëndimore Kosovës.
Kandidati i Vetvendosjes për Kryeministër Albin Kurti, u shpreh i bindur në fitore dhe bëri thirrje për pjesëmarrje masive
Zgjedhjet e parakohshme në Kosovë u ndoqën me interes të madh nga ndërkombëtarët.
Kreu i diplomacisë amerikane në Kosovë, Philip Kosnett, përmes një statusi në Twitter theksoi se çdo votë e qytetarëve të Kosovës, ka rëndësi absolute.
“Në Kosovë, si në Amerikë, çdo votë numërohet. Çdo zë ka rëndësi. Cilat do qofshin pikëpamjet tuaja, këdo që të mbështesni, dilni dhe votoni. Për veten, për vendin dhe për të ardhmen tuaj”
Përgjithësisht procesi i votimit u karakterizua nga një frymë e qetë zgjedhore por nuk munguan disa parregullsi që kishin të bënin me listat e zgjedhësve dhe ushtrim presioni ndaj votuesve.
Që në orët e para të procesit të votimit, në Mitrovicë policia me urdhër të prokurorisë ndaloi dy komisionerë pasi ata kishin lejuar votues serb që të votonin me dokumenta të Serbisë, në kundërshtim me udhëzimet e Komisionit Qendror të Zgjedhjeve
Sipas Koordinatores Nacionale për Zgjedhjet, Laura Pula, në rang vendi u arrestuan apo ndaluan 15 persona për keqpërdorim të votës dhe incidente të tjera në qendrat e votimit.
Gjatë ditës së sotme nuk kanë munguar as akuzat e ndërsjellta të partive politike për manipulime të mundshme.
Edhe Ministri në detyrë i Punëve të Jashtme të Shqipërisë, Gent Cakaj dhe Ministrja e Arsimit Besa Shahini kanë votuar të dy në Prishtinë.
Zgjedhjet pasuan dorëheqjen e kryeministrit Ramush Haradinaj me 19 korrik, pasi që u thirr për t’u marrë në pyetje në Prokurorinë e Posaçme në Hagë e cila trajton pretendimet për krime lufte dhe të pasluftës në Kosovë. Vetëvendosje, LDK, PDK, koalicioni AAK – PSD dhe koalicioni NISMA – AKR, janë partitë më favorite si dhe kanë dominuar në sondazhet e publikuara gjatë kohës së fushatës./Shqiptarja/
