Gjykata e Tiranës vendosi sot të dënojë për përhapje lajmesh të rreme ish-kryeministrin Sali Berisha dhe të dëmshpërblejë kryeministrin Edi Rama me shumën 500 mijë lekë si person i dëmtuar nga një shkrim në rrjetet sociale.
Zëdhënësja e gjykatës, Alba Nikolla, konfirmoi vendimin që mori sot gjyqtarja Mariana Shegani (Dedi), i cili përfshin edhe “detyrimin e palës së paditur të publikojë përgënjeshtrimin në faqen e tij në “Facebook” në lidhje me deklaratën e tij në atë rrjet social më 15 tetorin e 2018 me titull “Fundi i kakistokracisë së kallam dështakut po troket”, brenda 10 ditëve nga marrja formë të prerë e vendimit”.
Ky shkrim flet për takimet e kryeministrit Edi Rama në Berlin, i cili sipas paditësit përmban disa të pavërteta.
Gjyqtarja vendosi pranimin e pjesshëm të kërkesë padisë dhe detyrimin e palës së paditur të dëmshpërblejë me afro 5 dollarë amerikanë palën paditëse, e cila ishte shprehur për dyfishin e kësaj shume.
Ky vendim i gjykatës pritet të publikohet zyrtarisht të hënën, madje sipas një rregulli të ri, të dhënat e protagonistëve janë anonimizuar.
Zoti Berisha ende nuk është shprehur për këtë vendim, kundër të cilit ka të drejtë të ankohet në Gjykatën e Apelit brenda 15 ditëve nga publikimi i vendimit të arsyetuar.
