Presidenti i Ukrainës, Volodymyr Zelensky, ka publikuar mbrëmjen e së mërkurës një video-mesazh drejtuar popullit ukrainas. Në video-mesazhin e tij, Zelensky i cilëson si “shantazh energjitik” veprimet e ndërmarra së fundmi nga Rusia e cila i ka ndërprerë gazin Polonisë dhe Bullgarisë.
Ai thotë se ndërprerja e furnizimit me gaz për Poloninë dhe Bullgarinë tregon se “askush në Evropë nuk mund të shpresojë të mbajë ndonjë bashkëpunim normal ekonomik me Rusinë”.
Zelensky shton: “Rusia e konsideron si armë jo vetëm gazin, por çdo tregti. Ajo thjesht pret momentin kur mund të përdoret një ose një zonë tjetër tregtare.”
Sipas liderit rus, Rusia “e sheh Evropën e bashkuar si një objektiv” dhe sa më shpejt të gjithë në kontinent të bien dakord se nuk mund të varen nga Rusia për tregti, aq më shpejt do të ketë stabilitet.
Presidenti ukrainas përshëndeti gjithashtu propozimin e bërë nga BE për të pezulluar detyrimet dhe kuotat mbi eksportet e Ukrainës, duke shtuar se Rusia dëshiron të krijojë kaos në tregjet globale – veçanërisht për ushqimin.
Eksportet e Ukrainës do të ndihmojnë në stabilizimin e tregjeve dhe do të mbështesin ekonominë e vendit gjatë krizës, tha ai.
g.kosovari
