Kanë kaluar 1 mijë e 531 ditë nga nisja e luftës së Rusisë në Ukrainë. Ndërsa vëmendja globale mbetet e fokusuar në ngjarjet në Lindjen e Mesme, lufta në Ukrainë vazhdon me intensitet, ndërsa të dyja palët shkëmbejnë sulme me raketa dhe dronë.
Siç shkruan Sky News, Ukraina ka propozuar një armëpushim pa afat me Rusinë, i cili do të fillonte në mesnatën e sotme.
Zyrtarë të lartë rusë e kanë diskutuar publikisht planin, por Zelensky tha se oferta ishte “jo serioze” në një postim në aplikacionin Telegram gjatë natës.
“Ka ardhur koha që udhëheqësit rusë të ndërmarrin hapa realë për t’i dhënë fund luftës së tyre, veçanërisht pasi Ministria e Mbrojtjes së Rusisë beson se nuk mund të mbajë një paradë në Moskë pa vullnetin e Ukrainës.”, u shpreh Zelensky të hënën.
Ukraina tha se armëpushimi i saj do të fillonte në mesnatën e sotme dhe argumentoi se kjo kohë do të ishte e mjaftueshme për të testuar nëse mund të vendoset një pauzë e vërtetë në luftimet.
“Ne do të veprojmë në mënyrë reciproke nga ai moment,” shtoi ai.
Rusia shpalli një armëpushim të shkurtër muajin e kaluar për Pashkët Ortodokse, por si Kievi ashtu edhe Moska akuzuan njëra-tjetrën për shkelje të tij.
Rusia godet objektet energjetike të Ukrainës
Pesë persona kanë humbur jetën pas sulmeve me dronë dhe raketa ruse ndaj objekteve të prodhimit të gazit të kompanisë shtetërore energjetike të Ukrainës, ka deklaruar drejtori ekzekutiv i kompanisë.
Dy punonjës dhe dy punonjës të ekipeve të shpëtimit u vranë pas goditjeve në një objekt në rajonin qendror të Poltavës, ndërsa një tjetër punonjës u vra në një tjetër objekt në rajonin fqinj të Kharkivit.
Të dy objektet u dëmtuan rëndë dhe prodhimi u ndal, tha CEO i Naftogaz, Serhiy Koretskyi.
Volodymyr Zelensky akuzoi Rusinë për dy sulme të njëpasnjëshme në Poltava. Kjo ndodh kur një sulm fillestar pasohet nga goditje të tjera, shpesh duke shënjestruar civilë dhe ekipet e shpëtimit.
Ai gjithashtu e quajti “cinizëm të plotë” kërkesën për armëpushim për të mbajtur festime propagandistike, ndërsa kryhen sulme të përditshme me raketa dhe dronë.
“Çdo ditë, Rusia mund të ndalojë zjarrin dhe kjo do të ndalonte luftën dhe përgjigjet tona. Paqja është e nevojshme dhe për këtë duhen hapa realë. Ukraina do të veprojë në mënyrë simetrike.”, shkroi Zelensky mëngjesin e kësaj të marte.
