Në Tiranë u zhvillua Konferenca Rajonale mbi Klimën me temën “Të bashkuar për klimën”, një aktivitet që vuri theksin te rëndësia e bashkëpunimit ndërmjet vendeve të rajonit, inovacionit dhe politikave të gjelbra për mbrojtjen e mjedisit dhe të ardhmes së brezave.
Ambasadorja e Zvicrës në Tiranë, Ruth Huber, theksoi urgjencën e adresimit të krizës klimatike, duke nënvizuar se ajo nuk është më një kërcënim i largët, por një realitet që ndikon drejtpërdrejt në jetën e përditshme, ekonominë dhe mjedisin. Sipas saj, efektet e ndryshimeve klimatike nuk njohin kufij dhe prekin çdo vend në rajonin e Ballkani Perëndimor.
Konferenca synon të nxisë pikërisht këtë frymë bashkëpunimi, të cilën Zvicra e konsideron thelbësore për qëndrueshmërinë klimatike në rajon.
“Adresimi i çështjeve të klimës është shumë urgjente, kriza klimatike nuk është më një kërcënim i largët, ndikimet janë të pranishme në realitetin e ditës së sotme, duke prekur njerëzit mjedisin dhe zhvillimin ekonomik. Kur ndodh një krizë ekonomike nuk merr në konsideratë kufijtë apo vendet. Prek çdo vend, çdo sektor dhe çdo qytetar të Ballkanit Perëndimor, kështu të bashkuar për klimën është mënyra më e mirë për t’ju qasur kësaj çështjeve. Asnjë vend për t’ju qasur kësaj çështjeje. Asnjë vend nuk mund të adresojë vetëm rreziqet klimatike në këtë rajon keni basene lumore të përbashkëta, keni korridore dhe tregje të përbashkëta dhe cënueshmëritë janë të ndërlidhura dhe të tilla duhet të jenë dhe zgjidhjet prandaj kjo konferencë është e rëndësishme. Ajo synon të vë në lëvizje bashkëpunimin rajonal dhe Zvicra beson se ky bashkëpunim është thelbësor për të siguruar qëndrueshmërinë klimatike në rajon.”, u shpreh ambasadorja.
Gjithashtu ambasadorja bëri të ditur se bashkëpunimi për periudhën 2025–2028 do të fokusohet në nxitjen e veprimeve konkrete për përballimin e ndryshimeve klimatike. Vendet e Ballkanit Perëndimor, megjithëse ndajnë sfida të përbashkëta, kanë qasje të ndryshme në zbutjen e efekteve të klimës.
Sipas Huber, Shqipëria renditet ndër vendet më të ekspozuara në Evropë ndaj valëve të të nxehtit dhe përmbytjeve, të cilat kanë prekur vendin në dy dekadat e fundit, duke e bërë edhe më të domosdoshëm bashkëpunimin rajonal dhe politikat e qëndrueshme mjedisore.
“Bashkëpunimi është përcaktuar për vitin 2025-2028 me synim që të nxisë veprimet që janë të qëndrueshme ndaj ndryshimeve klimatike. Vendet e Ballkanit Perëndimor janë të ngjashme por edhe të ndryshme në formën se si adresojnë por edhe se si zbutin efektet e ndryshimeve klimatike. Shqipëria renditet në nivelet më të larta të vendeve evropiane për sa i përket ekspozimeve dhe prekjes së valëve të të nxehtit apo prej përmbytjeve që kanë prekur vendin në këto 2 dekada”, theksoi Huber.
