Dy trupat e mbytur të gjetur në bregdetin shqiptar gjatë muajit mars janë identifikuar pas 2 javësh. Mediat italiane raportojnë se kufomat u përkasin dy peshkatarëve italianë të zhdukur që më datë 15 mars.
Sipas hetimeve, vdekja e tyre ka ardhur pas kontaktit të trupit me ujin e ftohtë. Mësohet se ata janë Sante Lanziloti dhe Francesco de Biasi. Trupat e pajetë kanë qëndruar për disa kohë në morgun e Tiranës ndërsa identifikimi i tyre është bërë nga familjarët ku kanë dalluar tatuazhet dhe shenja të tjera.
Më parë, policia shqiptare gjeti dy trupat në distanca të ndryshme kohore ndërsa kishte nisur hetimet për trafikantë të mundshëm droge, por nuk përjashtoi mundësinë që ata të ishin shtetas të huaj.
Mësohet se peshkatarët Lanziloti dhe De Biasi ishin nisur nga porti Torre di Santa Sabrina me një varkë 6 metra të gjatë. Ata u gjendën të pajetë në Zvërnec dhe Spille. /b.d
