Zbardhet projektligji i ri “për rivlerësimin kalimtar të prokurorëve dhe gjyqtarëve”, ose siç njihet ndryshe ligji i Vetingut. Drafti i ri është ndryshuar nga ekspertët e Euralius dhe OPDAT dhe u është shpërndarë mbrëmjen e së martës anëtarëve të Komisionit të Posaçëm të Reformës në Drejtësi.
Në këtë projektligj u reflektuan dhe ndryshimet e reja kushtetuese, të cilat u votuan me 140 vota pro në Parlament, më 22 korrik. Ajo që bie në sy në draftin e ri është parashikimi që kanë vendosur në fund të projektligjit ekspertët e huaj. Ata kanë parashikuar dhe vendosur në projektligjin e Vetingut se hyrja e tij në fuqi do të jetë më datë 15 gusht.
Ndryshe nga debati politik për ta miratuar në seancën e së enjtes, më 28 korrik, ndërkombëtarët kanë caktuar në draft se hyrja e këtij projektligji në fuqi do të jetë pasi të marrin fuqi ligjore amendamentet kushtetuese, që sipas afateve, parashikohet të ndodhë në 10 gusht.
PËRZGJEDHJA
Kandidatët për anëtarë të Komisionit dhe Këshillit të Apelimit që do të kryejnë procesin e vetingut, në projektligj parashikohet të aplikojnë pranë Presidentit. Më pas, lista e kandidatëve verifikohet nga Presidenti, i cili i ndan pretendentët në dy lista, ata që i plotësojnë kriteret ligjore dhe ata që s’i plotësojnë.
Më pas, lista e kandidatëve do të kalohet në sitën e ndërkombëtarëve. Një komision me tre anëtarë të Operacionit Ndërkombëtar të Monitorimit verifikon listën dhe për kandidatët e papërshtatshëm jep rekomandimet. Më pas, lista i kalon Kuvendit bashkë me rekomandimet e Operacionit Ndërkombëtar. Në këtë pikë ngrihet një komision me 6 anëtarë, 3 maxhoranca dhe 3 opozita.
Komisioni ad hoc verifikon listën dhe vetëm me 5 vota pro miraton kandidatët duke ia përcjellë Kuvendit për votim. Po ashtu me 4 vota pro Komisioni ka të drejtë që të kalojë kandidatë nga lista e personave që sipas Operacionit Ndërkombëtar të Monitorimit nuk plotësojnë kriteret ligjore në listën e garuesve.
Pas këtij procesi, ngrihen dy nënkomisione të tjera, njëri me 12 anëtarë dhe tjetri me 6 anëtarë, të cilët bëjnë votimin e fshehtë të kandidatëve. Për rastet që ka balotazh, procesi zhvillohet me short. Lista e kandidatëve finalë votohet me 3/5 në Kuvend, nëse nuk miratohet në raundin e parë, ajo hidhet në votim një herë të dytë. Në votimin e dytë ajo mund të rrëzohet me 94, në rast të kundërt quhet e miratuar.
KUSH PËRJASHTOHET
Në projektligjin e ri të Vetingut është pasqyruar dhe një nga “meraqet” e opozitës. Anëtarët e Grupit të Ekspertëve të Nivelit të Lartë që asistuan në hartimin e reformës, të cilët u sulmuan publikisht nga ish-Kryeministri Sali Berisha, janë përjashtuar nga e drejta për të qenë anëtarë të Komisionit të rivlerësimit të gjyqtarëve dhe prokurorëve.
Në projektligjin e mëparshëm të depozituar në Kuvend, para konsensusit të madh PS-LSI- PD, ekspertëve të Nivelit të Lartë nuk u hiqej kjo e drejtë, por në draftin e rishikuar është shtuar një pikë e posaçme për ta.
Pas nenit që anëtarët nuk duhet të kenë qenë ish-bashkëpunëtorë të Sigurimit dhe nuk duhet të kenë qenë në funksionin e prokurorit dhe gjykatësit dy vitet e fundit, është shtuar dhe pika ndaluese: “g) nuk ka qenë anëtar i Grupit të Ekspertëve të Nivelit të Lartë, parashikuar në vendimin nr. 12, datë 02.04.2015 të Komisionit të Posaçëm Parlamentar për Reformën në Sistemin e Drejtësisë”./panorama/a.k
