Policia ka zbardhur djegien e katër automjeteve në Tiranë pas mesnatës. Sipas njoftimit zyrtar mësohet se ngjarja ka ndodhur rreth orës 02:40 në Unazë të Re, në afërsi të hotel “Roland”, janë djegur disa mjete.
Si pasojë e zjarrit janë djegur plotësisht mjetet “Nissan” dhe “Opel”, në pronësi të shtetases A. A., 32 vjeçe, banuese në Tiranë, si dhe janë dëmtuar pjesërisht mjetet tip “Mercedes Benz” dhe “Skoda”, të parkuara pranë tyre.
Autori i dyshuar për këtë ngjarje është shtetasi O. M., 27 vjeç, banues në Tiranë. Mësohet se shërbimet e Komisariatit të Policisë nr 6, po punojnë për shoqërimin e këtij shtetasi.
Shtetasi O. M., ka qënë i fejuari i motrës së shtetases A. A., me të cilën ka një konflikt prej disa kohësh. Objektivi i këtij shtetasi kanë qënë shkatërrimi i automjetit të shtetases A. A., dhe të bashkëshortit të saj, dy mjetet e tjera të përfshira në dëmtim ka ardhur si pasojë e përhapjes së flakëve.
Materialet hetimore u referuan në Prokurorinë e Rrethit Gjyqësor Tiranë, për veprën penale, “Shkatërrim i pronës me zjarr” parashikuar nga Neni 151 i Kodit Penal.
Ky është rasti i dytë i zjarrvënieve në harkun kohor të dy javë në Tiranë ku shkak është prishja e raporteve intime midis çifteve dhe hakmarrja.
Më 2 Prill ishte Desara Mançellari ajo e cila dogji 4 automjetet e babait të ish të dashurit të saj Filip Papajani.
