Presidenti kinez Xi Jinping nuk do të vizitojë Nju Jorkun për t’iu drejtuar Asamblesë së Përgjithshme të Kombeve të Bashkuara kur të jetë në Shtetet e Bashkuara në shtator, për t’u takuar me Presidentin Donald Trump.
Në vend të OKB-së, Xi do ta kufizojë praninë e tij në Shtetet e Bashkuara në takimin e tij me Trump më 24 shtator, raporton Politico.
Ai pritet të mbërrijë me shumë mundësi vonë në mbrëmjen e [së mërkurës] 23 shtator dhe të niset më 25, tha një nga burimet për median amerikane në kushte anonimiteti.
Ai shtoi se “në realitet, ai do të ketë vetëm një ditë takimesh në Shtëpinë e Bardhë, më 24”.
Shtëpia e Bardhë konfirmoi në një deklaratë se Xi do të vizitonte Shtëpinë e Bardhë më 24 shtator, por nuk pranoi të komentonte për ndonjë aktivitet tjetër të presidentit kinez.
Xi vizitoi për herë të fundit Nju Jorkun për t’iu drejtuar Asamblesë së Përgjithshme të OKB-së në vitin 2015, duke shënuar 70-vjetorin e themelimit të OKB-së. Ai gjithashtu iu drejtua Asamblesë së Përgjithshme të OKB-së nëpërmjet një lidhjeje video në vitin 2021 mes pandemisë së koronavirusit.
Në atë kohë, ai i ishte referuar në mënyrë indirekte dështimit të SHBA-së në Afganistan një muaj më parë, si pjesë e një përpjekjeje për të bindur vendet në zhvillim për një rend botëror pas-amerikan të bazuar në modelin e zhvillimit ekonomik të Kinës.
