Presidenti kinez Xi Jinping u takua të hënën me presidentin rus Vladimir Putin në kryeqytetin e Kirgizistanit Bishkek, gjatë Samitit të Organizatës së Bashkëpunimit të Shangait 2026.
Xi Jinping vuri në dukje se, në maj të këtij viti, presidenti Putin zhvilloi me sukses një vizitë shtetërore në Kinë.
“Nga një perspektivë strategjike e afatgjatë, ne bëmë marrëveshje për t’i drejtuar marrëdhëniet dypalëshe drejt një cilësie më të lartë e niveleve më të larta të zhvillimit, dhe arritëm konsensus për thellimin e bashkëpunimit midis Kinës e Rusisë në fusha të ndryshme në rrethanat e reja,” u shpreh ai.
Departamentet përkatëse të të dy vendeve po i zbatojnë në mënyrë aktive këto marrëveshje dhe tashmë kanë arritur shumë rezultate, vuri në dukje Xi, duke shtuar që shkëmbimet e bashkëpunimi midis të dy palëve po ruajnë një vrull të fuqishëm zhvillimi.
“Unë besoj se, nën udhëheqjen tonë strategjike dhe me përpjekjet e përbashkëta të të dyja palëve, themeli për zhvillimin e marrëdhënieve Kinë-Rusi do të jetë më i fortë, ritmi do të jetë më i vendosur dhe perspektivat do të jenë më të ndritshme,” tha ai.
Kreu i shtetit i Kinës theksoi më tej se Organizata e Bashkëpunimit të Shangait (OBSh) mban mbi vete misionin e rëndësishëm të ruajtjes së qëndrueshmërisë rajonale dhe promovimit të zhvillimit rajonal. Kina është e gatshme të punojë me të gjitha palët, përfshirë Rusinë, për të diskutuar së bashku planin e zhvillimit të OBSh-së, për të ndihmuar organizatën të arrijë përparim të qëndrueshëm e afatgjatë, si edhe për të forcuar rolin e saj në udhëheqjen e reformës së qeverisjes globale dhe në promovimin e një bote shumëpolare të barabartë e të rregullt
Nga ana e tij, presidenti rus Vladimir Putin deklaroi se, përballë një situate ndërkombëtare të trazuar e komplekse, Rusia dhe Kina kanë vazhduar të thellojnë bashkëpunimin e tyre të gjithanshëm strategjik, duke iu përmbajtur barazisë, besimit e mbështetjes së ndërsjellë.
Bashkëpunimi në fusha të ndryshme është zhvilluar me shpejtësi dhe marrëdhëniet ruso-kineze janë bërë një model i marrëdhënieve ndërshtetërore. Rusia është e gatshme të mbajë shkëmbime të nivelit të lartë me Kinën, të forcojë bashkëpunimin në tregti, energjetikë, industri, transport, shkencë e teknologji dhe fusha të tjera, të rrisë shkëmbimet njerëzore dhe të nxitë arritje të reja në marrëdhëniet dypalëshe. Me përpjekjet e përbashkëta të të gjitha palëve, Organizata e Bashkëpunimit të Shangait (OBSh) është bërë një platformë bashkëpunimi rajonal me ndikim e efikasitet të lartë.
Rusia e Kina duhet të forcojnë vazhdimisht unitetin dhe bashkëpunimin brenda organizatës dhe të luajnë një rol udhëheqës. Rusia është e gatshme të forcojë koordinimin dhe bashkëpunimin me Kinën brenda mekanizmave shumëpalësh, si OKB, BRICS dhe G20, ta mbështesë Kinën në organizimin e Takimit Jozyrtar të Liderëve të APEC-ut dhe të mbrojë së bashku me të paqen, qëndrueshmërinë dhe prosperitetin botëror, theksoi presidenti rus.
