Intervista e dhënë nga Nexhmije Hoxha e veja e ish-diktatorit komunist, për gazetaren Rudina Xhunga në emisionin “Dritare”, në opinionin publik dhe në mediat e ndryshme ajo ka ngjallur debat. Gazetarja u kritikua ashpër për intervistën edhe nga Pëllumb Kulla, të cilit Rudina Xhunga i’u përgjigj në këtë mënyrë në portalin dritare.net që drejtohet prej saj:
“Sot në gazetën “Dita” është botuar një artikull i Pëllumb Kullës ku akuzonte Nexhmije Hoxhën dhe intervistuesen e saj si dy femra të dashuruara me Enverin.
Pas statusit të tij në facebook dhe publikuar nga “Dita”, ku bënte thirrje që intervista mos shikohej, ish skenaristi, humoristi, dhe regjizori i Estradës së Fierit, i shpërblyer me bursë nga vetë Enver Hoxha, goditi sërisht. E kishte parë të gjithë intervistën dhe kishte bërë edhe interpretimet përkatëse. Vetëm se ndryshe nga hera e parë kur hodhi në kurriz gjithë komentuesit, këtë herë vendosi rekordin e ri, duke mos pasur asnjë komentues. Edhe fanatikët e komunizmit ngjajnë të lodhur nga Don Kishotët e antikomunizmit.
Do të jetë interesante kur Nexhmije Hoxha të botojë letrat e ish ithtarëve të saj, që i ka ende në arkivë. A thua do të ketë ndonjë letër falenderimi ndaj rregjimit dhe asaj vetë, nga kritikët e sotëm?”, shkruhet në portalin dritare.net.
